Ruya Ignatova, e njohur si “Mbretëresha e kriptomonedhave”, e cila është kërkuar prej vitesh për mashtrime me kriptomonedha dhe këshilltari i saj Frank Schneider arritën të shesin prona në Dubai, pavarësisht se në Amerikë u akuzuan për një mashtrim me kriptomonedha prej katër miliardë dollarësh. FBI dhe Europol i kanë kërkuar prej vitesh, por pa sukses.
Pasuri të paluajtshme në parajsë
Aplikacioni i fitnesit kapi udhëtimin me biçikletë të Schneider më 21 mars 2020 rreth një kompleksi luksoz në Dubai, zbuloi OCCRP .
Schneider bleu një apartament atje për dy milionë dollarë në fillim të vitit 2018. Ruya Ignatova, gruaja e akuzuar si organizatorja e mashtrimit masiv të kriptove “OneCoin”, bleu një apartament nën çati në vitin 2015 në të njëjtin komunitet të mbyllur.
Ignatova dhe Schneider filluan të punojnë së bashku pasi Schneider la punën e tij si drejtor i operacioneve për shërbimin e spiunazhit të Luksemburgut për të krijuar firmën e tij të inteligjencës korporative. Schneider dyshohet se ndihmoi “shmangien e hetimeve” dhe ndihmoi “menaxhimin e të ardhurave të skemës”, sipas aktakuzës së SHBA kundër tij.
Në kohën kur Schneider u nis në xhiron e tij të mesditës me biçikletë në vitin 2020, Ignatova ishte zhdukur dhe OneCoin ishte shembur, duke i kushtuar investitorëve më shumë se katër miliardë dollarë.
Të dhënat pronësore të zbuluara në Dubai tregojnë se pronat e Ignatova dhe Schneider u shitën pasi u akuzuan për vepra penale, duke ngritur pikëpyetje në lidhje me zbatimin e rregullave kundër pastrimit të parave në Dubai.
Ignatova bleu apartamentin e saj prej 500 metrash katrorë përmes një kompanie false. Një dokument pronësie i marrë nga një partner OCCRP tregon se kompania e shiti pronën në dhjetor 2019, kur prokurorët në Nju Jork kërkuan Ignatova.
Fatkeqësia “OneCoin” ishte e njohur në kohën kur u shitën pasuritë e paluajtshme. Raporte të shumta mediatike kanë cituar viktimat që përshkruanin në detaje se si Ignatova i mashtroi për të blerë kriptomonedhën e saj të rreme. BBC ndoqi ngritjen e shpejtë dhe rënien spektakolare të Ignatova në një podcast popullor të lançuar në shtator 2019 të quajtur “Mbretëresha e kriptove të zhdukur”, e cila përfshinte një seri intervistash me viktima.
Ignatova dhe Schneider arritën të kryejnë marrëveshje të pasurive të paluajtshme pavarësisht një ligji të Emirateve të Bashkuara Arabe në fuqi që nga viti 2019, i cili kërkon që agjentët e pasurive të paluajtshme të kryejnë kontrolle mbi blerësit dhe shitësit e pasurive të paluajtshme dhe të raportojnë çdo transaksion të dyshimtë tek autoritetet.
“Duhet të njihni klientët me të cilët keni të bëni,” tha Henry Wyad, një analist hetimi në Themis, një firmë me bazë në Mbretërinë e Bashkuar dhe Emiratet e Bashkuara Arabe që ndihmon klientët të menaxhojnë rreziqet e krimit financiar. Ligji është “ekslicit” për këtë dhe mbulon qartë si shitësin ashtu edhe blerësin, shtoi ai.
Megjithatë, ky rast nuk është befasues, sipas Alexander Yearsley, drejtor menaxhues i Martello Risk me qendër në Edinburg, i cili udhëhoqi hetimet financiare dhe auditimin mjeko-ligjor në Dubai.
Zyrtarët e Emirateve të Bashkuara Arabe, duke përfshirë Ministrinë e Brendshme, Ekonominë dhe Drejtësinë, si dhe Policinë e Dubait, nuk iu përgjigjën pyetjeve të hollësishme të gazetarëve të OCCRP në lidhje me shitjen e pronave që i përkasin Ignatova dhe Schneider. Ambasadat e Emirateve të Bashkuara Arabe në Mbretërinë e Bashkuar dhe Norvegji dërguan një koment të shkurtër duke thënë se vendi “po punon ngushtë me partnerët ndërkombëtarë për të penguar dhe parandaluar të gjitha format e financimit të paligjshëm”.
Iku, u zhduk, u ndalua, u arratis
Prokurorët në Distriktin Jugor të Nju Jorkut e akuzuan Schneider në vitin 2019 për komplot për të kryer mashtrime dhe pastrim parash për rolin e tij në skandalin OneCoin. Ai u arrestua në prill 2021 në Francë për t’u përballur me ekstradimin në SHBA.
Nuk është e qartë nëse autoritetet e Emirateve të Bashkuara Arabe ishin në dijeni të akuzave të SHBA kundër Schneider, por të dhënat e marra nga OCCRP tregojnë se ai ishte në gjendje të shiste apartamentin e tij ndërsa ishte në arrest shtëpiak në Francë.
Schneider, megjithatë, nuk u ekstradua kurrë në Shtetet e Bashkuara. Në maj të vitit 2023, ai u arratis nga arresti shtëpiak dhe u zhduk.
Sipas të dhënave të Dubait, të dhënat më të fundit të Schneider tregojnë se qëndrimi i tij ishte lejuar deri në korrik 2023, gjë që do ta lejonte atë të hynte legalisht në Dubai në kohën kur u arratis nga paraburgimi francez.
Një zëdhënës i FBI-së i tha OCCRP se Schneider “mbetet i lirë”. Por gazetarët zbuluan të dhëna të reja që lidhin Schneider me Indonezinë, e cila nuk ka një traktat ekstradimi me SHBA.
Schneider u shfaq si drejtor i një kompanie të regjistruar në Indonezi të quajtur “White Orchid Management”, e cila përshkruhet në dokumentet e regjistrimit si e krijuar në mars 2020 për të blerë, shitur, marrë me qira dhe menaxhuar pasuri të paluajtshme.
Në shtator të vitit 2023, aksionet e kompanisë iu kaluan gruas dhe djalit të tij dhe ai u largua nga posti i drejtorit.
Misteri i gruas së kërkuar
U zhduk pa gjurmë edhe Ruja Ignatova. Partneri mediatik bullgar i OCCRP, “Bird”, raportoi në shkurt 2023 se Ignatova ka të ngjarë të ishte vrarë, vdekja e saj nuk është konfirmuar kurrë. Në vitin 2022, Byroja Federale e Hetimeve të SHBA-së e shpalli Ignatova, e cila ka lindur në Bullgari dhe është bërë shtetase gjermane, një nga të arratisurit më të kërkuar.
Një zëdhënës i FBI-së deklaroi se agjencia “është në dijeni të raporteve të mediave në lidhje me vdekjen e Ruya Ignatova, megjithatë, derisa të ketë prova të dokumentuara se ajo ka vdekur, FBI e konsideron Ignatova të gjallë dhe ajo mbetet në listën e 10 më të kërkuarve të FBI-së”.
Ndërkohë, partneri i saj dhe bashkëthemeluesi i OneCoin, Carl Sebastian Greenwood, u deklarua fajtor për mashtrim dhe pastrim parash. Në shtator 2023, ai u dënua me 20 vjet burg dhe i konfiskoi 300 milionë dollarë.
