Më shumicë të votash, Asambleja Parlamentare e NATO-s e ka miratuar rekomandimin për avancim të statusit të Kosovës nga anëtare vëzhguese në anëtare të asociuar të kësaj organizate.
Njohësi i sigurisë Avni Islami tha se meqë Kosova tashmë është pjesë e Asambles Parlamentare të NATO-s do t’i dëgjohet zëri dhe do ta ketë më lehtë që t’i demantojë gënjeshtrat e Serbisë.
“Aty ku dëgjohej zëri i Serbisë tashmë do të dëgjohet edhe zëri i përfaqësuesve të Republikës së Kosovës dhe kjo është një argumentim i mirë dhe është shumë më e lehtë që të demantohen gënjeshtrat e Serbisë të cilat në çdo forum ndërkombëtar duke përfshirë Këshillin e Sigurimit dhe organizmat e tjerë përpiqet që me gënjeshtrat e saj ta manipulojë me shtete të ndryshme. Tashmë mëqë Kosova është pjesë e Asamblesë Parlamentare të NATO-s do ti dëgjohet zëri dhe do ta ketë më lehtë që ti neutralizoj gënjeshtrat e Serbisë”, tha ai në “Info Plus”, në RTK.
Ai shtoi se gjëja e vetme qe tani nuk mund të bëjë Kosova si anëtare e asociuar është se nuk mund të votojë.
“Zëri i parlamentit të Kosovës, kërkesat të cilat janë të nevojshme t’i paraqesin institucionet e Kosovës përmes Asamblesë Parlamentare të NATO-s, do të adresohen më lehtë dhe do të jenë prezent në çdo instancë, çdo forum nëpër komitete”, tha ai.
Islami tha se shteti i Kosovës, Ushtria e Kosovës aspiron që në një periudhë sa më të shpejtë të bëhet pjesë e Aleancës Veriatlantike.
“Deri me tani përveç konsumit të paqes dhe sigurisë brenda territorit të Kosovës aspirojmë që Kosova me ushtrinë e vet të prodhojë paqe dhe siguri jo vetëm për vendin tonë, por së bashku me Aleancën Veriatlantike të kontribuojnë për ruajtjen e paqes dhe sigurisë në rajon edhe në botë”, tha Islami.
Sa i përket situatës së përgjithshme, Islami tha se gjendja në Kosovë sidomos në veri është e qetë dhe pa tendenca të destabilizimit.
“Që nga 24 shtatori i vitit të kaluar, kur është ndërmarr një aksion terrorist, paraushtarak i militarëve nga forcat serbe të dirigjuara nga Aleksandër Vuqiçi, dhe pas një fitore në teren nga ana e Forcave të Sigurisë së Kosovës, dhe një fitore e madhe në rrafshin ndërkombëtar institucionet e sigurisë së Kosovës kanë arritë ta shtrijnë sovranitetin, integritetin cep më cep edhe në veriun e Kosovës. Kjo tregon se gjendja e sigurisë në tërë territorin e Republikës së Kosovës por dhe në veçanti në katër komunat e veriut të Kosovës ku në vazhdimësi kemi pasur probleme me grupe të ndryshme kriminale, dhe me strukturat paralele të Serbisë, tashmë në atë pjesë të Kosovës vepron rendi dhe ligji, kushtetutshmëria e jonë dhe se kemi një gjendje stabile, ku nuk pres që edhe në të ardhmen të ketë destabilitet”, tha ai.
