Drejtori ekzekutiv i Odës Ekonomike Amerikane, Arian Zeka, tha se masat e Bashkimit Evropian ndaj Kosovës nuk janë të arsyeshme sepse prej tyre humbin mundësi të rëndësishme për zhvillimin ekonomik dhe nga to pësojnë qytetarët e shtetit.
“Në rrethana të tjera nga masat e tilla do duhej të ishin vendimmarrësit ata të cilët do duhet ballafaquar me to. Megjithatë kështu nuk funksionon politika. Kështu nuk funksionojnë as raportet gjeopolitike, as raportet ndërmjet shteteve. Për fat të keq ne si qytetarë të këtij vendi i vuajmë pasojat e gabimeve të institucioneve”, tha ai në një intervistë në Info Plus të RTK-së.
Sipas tij disa vendime ndonjëherë mund të merren shumë më lehtë se sa mund të revokohen. “Pastaj vjen mundësia që për shtete individuale, anëtare të Bashkimit Evropian që të vënë kushte që ne duhet t’i plotësojmë”, tha ai .
Ai ka folur edhe për çështjen e raporteve ndërmjet Kosovës dhe ShBA-ve dhe çështjen e dinarit.
“Natyrisht janë raporte që ne do duhej të bënim çmos që t’i kultivonim e t’i sillnim në nivelin më të lartë. Besoj që ne historikisht e dimë rëndësinë e raporteve të pacenueshme ndërmjet Shteteve të Bashkuara të Amerikës dhe Kosovës, prandaj është e pakuptimtë që institucionet tona nuk po e bëjnë të vetmen gjë e cila po kërkohet nga zyrtarët e lartë amerikanë, e që është koordinimi me ta”.
Duke folur për vendimin e BQK-së, Zeka theksoi se Kosova ka të drejtë të caktojë politikat e veta monetare, por sipas tij disa çështje janë më të ndjeshme sepse prekin edhe jetën e një komuniteti.
“Asnjëri prej tyre nuk e kanë mohuar të drejtën tonë, e as të BQK-së që të marrin vendime. Ajo çfarë është kërkuar nga zyrtarët amerikanë dhe të BE-së është një koordinim paraprak ndërmjet institucioneve tona dhe tyre”, tha Zeka.
E duke folur për deklarimin e ambasadorit të Bashkimit Evropian në Kosovë, Tomas Szunyog, për heqjen e masave për produktet serbe, por jo për heqjen e sanksioneve të BE-së për Kosovën, Zeka tha se këto janë dy çështje të ndryshme .
“E para është një vendim që ka të bëjë më rregullimin ose prishjen e marrëdhënieve të mira fqinjësore që është parakusht për integrimin e shteteve në Bashkimin Evropian. Unë besoj që Qeveria e Kosovës do të reflektojë dhe sa më shpejtë e mundur te rishikoj këtë vendim”, deklaroi Zeka. Ai tha se kjo është një pengesë që më shumë i godet kompanitë që përfaqësojnë interesat e huaja si ato amerikane, gjermane, zvicerane dhe belge, se sa ato serbe.
