Kryeministri Albin Kurti takoi për një mëngjes pune përfaqësuesin e posaçëm të Gjermanisë për Ballkanin Perëndimor, Manuel Sarrazin, në Rezidencën e ambasadorit të Gjermanisë në Kosovë, Jorn Rohde.
Në një njoftim nga Qeveria thuhet se progresi në zbatimin e marrëveshjeve të mobilitetit në Procesin e Berlinit, bashkëpunimi rajonal dhe pritjet nga samiti i radhës, që në 10-vjetorin e tij do të mbahet në Berlin, ishin temë e diskutimit.
Sipas njoftimit, kryeministri kujtoi rëndësinë që para samitit të radhës të fillojë zbatimi i Marrëveshjes për udhëtim me letërnjoftime ndërmjet Kosovës dhe Bosnjë e Hercegovinës, që lehtëson lëvizjen e lirë të qytetarëve.
“Kryeministri theksoi se më 16 maj në Kotor të Malit të Zi Kosova kërkoi që Ballkani Perëndimor të bëhet pjesë e Autoritetit kundër Pastrimit të Parave (AMLA) të Bashkimit Evropian për të rritur integritetin financiar dhe për të forcuar bashkëpunimin në luftën kundër krimit financiar, kërkesë kjo që u bë pjesë e deklaratës së përbashkët të lëshuar në Kotor”, theksohet në njoftim.
“Për kontributin dhe rolin e tij në forcimin e marrëdhënieve ndërmjet Republikës së Kosovës dhe Gjermanisë, si dhe në avancimin e bashkëpunimit rajonal, kryeministri e falënderoi Sarrazinin”, thuhet në njoftim.
“Procesi i Berlinit është platforma ku angazhohemi për bashkëpunim rajonal dhe integrim ekonomik. Tregu i Përbashkët Rajonal i dalë nga Procesi i Berlinit së bashku me Planin e Rritjes janë mundësi për zhvillimin e Ballkanit Perëndimor dhe shpejtimin e reformave për anëtarësim në Bashkimin Evropian. Republika e Kosovës është proaktive dhe kontribuuese e këtij procesi të rëndësishëm”, citohet të ketë theksuar Kurti. /Kosovatimes/
