Enea dhe Ariona, nxënëse të gjimnazit “Ahmet Gashi” në Prishtinë, numërojnë ditët kur do të përshëndeten me shoqet e shokët e shkollës së mesme. Paralelisht, po bëhen gati për paraqitjen e provimit për maturën shtetërore. Për herë të parë, kjo do të bëhet online.
“Po jemi informuar si nxënës i kësaj shkolle që aplikimi i testit të maturës kemi me bë në e-Kosova. Ka qenë një lloj shlirimi për neve se nuk e kemi pasur stresin me shku me apliku fizikisht dhe me qenë më të qetë për me u përgatit për test. Kjo ka qenë një anë pozitive që na ka ndihmu për aplikimin e testit të maturës. Nuk kam apliku ende, por e di që kanë fillu aplikimet dhe po e marrim pak më shtruar”, ka thënë nxënësja Enea Kulingja.
Kurse nxënësja Ariona Pacolli, ka thënë se aplikimi online është një mënyrë më e mirë dhe më e lehtë për shkak se kanë më pak stres dhe më shumë vëmendje besoj.
Por, drejtuesit e kësaj shkolle thonë se aplikimi online është i vonuar dhe i komplikuar.
“Jo nuk kemi qenë të njoftuar. Ministria e Arsimit ka marrë vendim tani. Unë besoj që kjo është shumë më e komplikuar. Ne më parë i kemi pas kujdestar të klasëve në bashkëpunim me drejtorin e shkollës, i kemi përcjell listat. Tash është pothuajse dy fish punë për shkak se ata aplikojnë online, gabojnë, nuk dinë me u orientu, do të thotë ka me qenë më problem sesa që ka qenë më herët”, ka thënë Haxh Metaj, drejtor i shkollës së mesme “Ahmet Gashi” në Prishtinë.
Nga Ministria e Arsimit deklarojnë se përgatitjet për këtë platformë kanë filluar që nga viti i kaluar.
“Mirëpo shkollat, nxënësit ndoshta mund të thuash me vonesë e kanë marrë informatën se do të jetë online, mirëpo paraqitja e maturës është me kohë”, ka thënë Fatmir Elezi, udhëheqës i Divizionit për Vlerësim, Standarde dhe Monitorim
Ata thonë se nxënësit duhet të hapin një llogari në e-Kosova, pastaj të paraqesin provimin e maturës, ku afati zyrtarisht fillon nga 1 deri më 11 qershor. Më 22 qershor, kur është edhe dita e provimit, nxënësit janë të obliguar të kenë më vete letërnjoftimin, përderisa ata që posedojnë telefon, do të përjashtohen nga testimi.
Deri tani mbi 5 mijë nxënës e kanë paraqitur provimin e maturës, prej 23 mijë sa janë gjithsejtë.
