Prizreni është mirë i furnizuar me ujë. Megjithatë, borxhi i akumuluar nga konsumatorët në Komunën e Prizrenit ndaj kompanisë “Hidroregjioni Jugor” kap shifrën mbi 12 milionë euro. Zyrtarët e kësaj kompanie thonë se kanë filluar me shkyçjet për borxhlinjtë.
Konsumatorët e ‘Hidroregjionit Jugor’ janë të kënaqur me furnizimin me ujë të pijshëm, derisa pajtohen që të shkyçen të gjithë ata që nuk i paguajnë faturat.
“Unë edhe bunar kam edhe qeshmë kam, vjen 10 euro, ndonjëherë 12, e ndonjëherë 3 euro. Normal duhet mu shkyç, ku ke pa ti pa pagu “, thekson konsumatori Avdullash Krasniqi.
Edhe Burbuqe Likaj është e pajtimit që kush nuk paguan uji të shkyçet.
“Po kur se paguan patjetër duhet me shkyç, derisa po e harxhojmë, pa ujë s’ka jetë”, tha ajo.
Kurse, Zef Nrejaj, thekson se borxhlinjve të këqij dhe keqpërdoruesve duhet t’i shkyçin.
Burimet e ujit në komunën e Prizrenit janë me kapacitete të plota pas reshjeve të shumta që pasuan këtë vit.
“Në radhë të parë kemi dashur të jemi transparent dhe të bëjmë matjen e të gjitha burimeve, dhe fatkeqësisht kemi konstatuar se kemi humbje të ujit në total mbi 74 % dhe kemi evidentuar zonat që kanë pasur mbi 94% humbje. Nga janari i kemi identifikuar mbi 350 lidhje ilegale, lidhje që i kemi shkyçur nga rrjeti dhe është hapur procedurë në bazë të ligjit në fuqi”, tha Fadil Berisha nga KRU ” Hidroregjioni Jugor”
Berisha thotë se jo vetëm keqpërdoruesit, por, për mospagesë, nga rrjeti i furnizimit më ujë të pijshëm janë shkyçur edhe borxhlinjtë e këqij.
Borxhi ndaj ‘Hidroregjionin Jugor’ kap vlerën mbi 12 milionë euro, ku 9.9 milionë euro janë nga amvisëria, ndërsa 1.9 milion euro nga bizneset.
