Në kohën kur marrëdhëniet me ndërkombëtarët nuk janë të mira, e Kosova nuk po shënon rezultate pozitive në rrugën integruese, krerë të shtetit e aktorë politikë opozitarë janë të ndarë e të përçarë. Kështu të paktën thonë njohës të politikës, sipas të cilëve ky mosunitet po e dëmton vendin drejt proceseve të rëndësishme.
Të ndarë e të përçarë, krerë të shtetit e të zgjedhurit e popullit në legjislativ, po e përfaqësojnë vendin para proceseve të rëndësishme integruese.
Rezultatet vlerësohet se nuk janë të mira, s’ka njohje e as anëtarësim në organizata ndërkombëtare.
E unitet nuk ka as kur marrëdhëniet me ndërkombëtarët vlerësohet se nuk janë të mira, e kur presioni për të dërguar draftin e themelimit të Asociacionit në Kushtetuese është shtuar.
Për këtë, deputeti i PDK-së, Hisen Berisha, i ka dërguar një letër presidentes Vjosa Osmani, me ç’rast edhe i ka kërkuar dorëheqjen.
“Ky akt do të shërbente si një mesazh i qartë dhe i fuqishëm kundër pranimit të asociacionit dhe do të tregonte se ju nuk jeni pjesë e kësaj politike që rrezikon të ardhmen e vendit tonë”.
Çështja e Asociacionit dhe procesi për anëtarësimin e Kosovës në Këshillin e Evropës, së fundmi kanë shpërfaqur pakënaqësitë mes dy krerëve të shtetit, raporton RTK.
Sipas njohësve të fushës, mosuniteti mes krerëve të shtetit e po ashtu mes ekzekutivit dhe opozitës, do ta dëmtojë vendin në rrugën integruese.
Pakënaqësitë mes ekzekutivit dhe presidentes u shpërfaqën kur kryediplomatja Donika Gërvalla i dërgoi një letër Këshillit të Evropës, ku u zotua se do ta dërgojnë draftin e Asociacionit në Kushtetuese. Për të njëjtën, nuk ishte informuar shefja e shtetit.
