Kremlini i ka quajtur një përshkallëzim të hënën se komentet e Sekretarit të Përgjithshëm të NATO-s, Jens Stoltenberg, rreth bisedimeve për vendosjen e më shumë armëve bërthamore.
NATO është në bisedime për të vendosur më shumë armë bërthamore, duke i nxjerrë ato nga magazinimi dhe duke i vendosur në gatishmëri, përballë një kërcënimi në rritje nga Rusia dhe Kina, kishte deklaruar Stoltenberg për gazetën The Telegraph.
Zëdhënësi i Kremlinit Dmitry Peskov tha se komentet e Stoltenberg duket se kundërshtojnë komunikatën e Konferencës së Ukrainës, e cila thoshte se çdo kërcënim ose përdorim i armëve bërthamore në kontekstin e Ukrainës ishte i papranueshëm.
“Ky nuk është gjë tjetër veçse një tjetër përshkallëzim i tensionit,” ka thënë Peskov për komentet e shefit të NATO-s.
Rusia thotë se Shtetet e Bashkuara dhe aleatët e saj evropianë po e shtyjnë botën në prag të konfrontimit bërthamor duke i dhënë Ukrainës armë me vlerë miliarda dollarë, disa prej të cilave po përdoren kundër territorit rus.
Rusia dhe Shtetet e Bashkuara janë deri tani fuqitë më të mëdha bërthamore në botë, duke mbajtur rreth 88% të armëve bërthamore në botë, sipas Federatës së Shkencëtarëve Amerikanë.
Shtetet e Bashkuara kanë rreth 100 armë bërthamore jo strategjike B61 të vendosura në pesë vende evropiane – Itali, Gjermani, Turqi, Belgjikë dhe Holandë, sipas Buletinit të Shkencëtarëve Atomik.
ShBA ka edhe 100 armë të tjera brenda kufijve të saj.
Rusia ka rreth 1,558 koka bërthamore jo strategjike, megjithëse ekspertët e kontrollit të armëve thonë se është shumë e vështirë të thuhet se sa ka për shkak të fshehtësisë.
