Në Prishtinë për herë të parë po mbahet Forumi i Biznesit Kosovë-Portugali.
Në hapjen e tij, e para e Ministrisë së Punëve të Jashtme, Donika Gërvalla-Schwarz, tha se mbajtja e këtij forumi do të ndikojë në fuqizimin e ekonomisë.
“Ky event shënon një moment historik mes Kosovës dhe Portugalisë për të fuqizuar ekonominë tonë. Në vitin 2023 Kosova shënoi një rritje ekonomike rekorde. Mbështetja e Portugalisë ndaj Kosovës ka qenë shumë e rëndësishme. Portugalia na ka mbështetur në momente shumë kruciale për vendin. Le ta shfrytëzojmë këtë moment për të arritur qëllimet tona. Qeveria e Kosovës është e gatshme dhe ka krijuar kushte të favorshme për investitorët e huaj”, tha Gërvalla.
Ndërsa, nënkryetarja e Kuvendit të Kosovës, Saranda Bogujevci, u shpreh se tashmë të dy vendet kanë vendosur themelet e një miqësie parlamentare. Sipas saj, Kosova ka se çfarë të ofrojë për tregun ndërkombëtarë.
“Mbledhja e sotme hapë një kapitull të ri për Kosovën dhe Portugalinë. Ne veçse kemi vendosur themelet e një miqësie parlamentare mes Kosovës dhe Portugalisë. Kosova ofron një partneritet të shkëlqyeshëm në shumë sfera të ndryshme. Vendi ka potencial në shumë sfera dhe ka se çfarë të ofrojë”, shtoi ajo.
Nënkryetari i Kuvendit të Portugalisë, Marcos Perestrello, premtoi mbështetjen e mëtutjeshme ndaj Kosovës.
“Lufta e fundit në Kosovë e solli kontingjentin e Portugalisë na këtë vend. Portugalia e njohu pavarësinë e Kosovës në 2008-tën dhe që atëherë është rritur edhe mbështetja për rrugën euro-atlantike”, theksoi ai.
Ndërsa, kryetari i Odës Ekonomike të Kosovës, Lulzim Rafuna, potencoi se me anë të këtij bashkëpunimi po u hapet rruga bizneseve kosovare drejtë tregut ndërkombëtarë.
“Për herë të parë ne mirëpresim një delegacion kaq të madh të bizneseve portugeze. Kjo ngjarje është një fillim premtues. Sot do të nënshkruajmë dy marrëveshje të cilat do të na mundësojnë zgjerimin e rritjes së partneritet. Së bashkë do të zhvillojmë rrugët e bashkëpunimit ekonomik. Oda Ekonomike e Kosovës është duke punuar me gjithë kapacitetin që të ketë rritje të partneriteteve ndërkombëtare në mënyrë që bizneset tona të gjejnë partnerë ndërkombëtarë”, theksoi Rafuna.
