John Newbigin, zyrtar i kontraktuar nga British Council për strategjinë e industrisë kreative në Kosovë, i ftuar në ‘RTKPrime’ ka folur por ekonominë kreative, që sipas tij është një bashkim i artit dhe kulturës, industri e bazuar në kulturë, por edhe ndikimi ekonomik që këto kanë në shoqëri.
A theksoi se duke pasur parasysh transformimin digjital, industritë që kanë qenë shumë më parë, tani po ndikojnë fuqishëm edhe në pjesët tjera të ekonomisë.
“Pra ekonomia kreative është mënyra se si këto industri kreative po ndikojnë në gjithë ekonominë dhe shtyjnë përpara inovacionin dhe shtyjnë përpara praktika të mira të biznesit”, tha Newbigin.
Ai më tej foli për fillet e para të zbatimit të një ekonomie të tillë kreative në Mbretërinë e Bashkuar, që ishte e vështirë, ngase, shtoi ai, institucionet qeverisëse nuk kishin të dhëna të mjaftueshme për bizneset kulturore, kreative. Mirëpo, me kalimin e kohës u pa qartë se këto biznese ishin shumë të fuqishme.
“Ata krijonin dyfish më shpejtë vende pune, sesa bizneset tjera”, qartësoi Newbigin në “RTKPrime”.
Tutje, ai foli për artistët të cilët nuk ndjeheshin pjesë e biznesit kreativ, ngase, sikundër vuri në dukje Newbigin, ata kujtonin veten pjesë të kulturës.
“Sigurisht që artet janë thelbi i vlerës së tillë në shoqëri, por ka edhe fuqi ekonomike”, deklaroi Newbigin, teksa përmendi video-lojërat, etj., që gjenerojnë të hyra dhe vende pune.
Ai më tej tha se çdo vend ka interes për këtë lloj ekonomie, teksa nënvizoi se OKB ka vlerësuar se kjo ekonomi është duke u zhvilluar më shumë se çdo ekonomi tjetër në botë.
Newbigin tha se ekonomia botërore po ndryshon nën ndikimin e teknologjisë digjitale.
