Trajneri i Anglisë, Gareth Southgate, pranoi se performanca e ekipit të tij në dy ndeshjet e para në Euro 2024 ka qenë nën pritshmëritë.
Duke folur për BBC pas barazimit të fundit kundër Danimarkës, Southgate shprehu shqetësimin e tij për mungesën e kontrollit të topit dhe përmirësimin e nevojshëm në lojën e ekipit.
“Është e qartë se nuk është ajo që kishim shpresuar. Ne nuk po e përdorim topin mjaft mirë dhe duhet të pranojmë që nëse nuk e bëni këtë, do të vuani ndonjëherë siç kemi vuajtur sonte. Ne e dimë se është një nivel tjetër që duhet të gjejmë”, tha Southgate.
Kur u pyet nëse i kishte kërkuar skuadrës të tërhiqej thellë pas shënimit të golit, ai u përgjigj: “Jo. Unë mendoj se kemi luajtur me ekipe që janë mjaft të rrjedhshme në treshen e fundit dhe nuk është e lehtë të kemi presion mbi to, por ne duhet ta bëjmë këtë më mirë se sa kemi bërë deri tash. Në këto dy ndeshjet e fundit mosmbajtja e topit ka qenë një problem tjetër”.
Southgate gjithashtu shpjegoi arsyetimin pas zëvendësimeve të tij, duke përfshirë largimin e Trent Alexander-Arnold dhe Harry Kane. “Doja që Conor [Gallagher] të luante. Ne kishim nevojë për energji, kishim nevojë për të shtypur më mirë. Conor e bën këtë shumë mirë. Largimi i Kane? Ne kishim nevojë për energji. Kemi pasur dy ndeshje në një periudhë të shkurtër dhe na duheshin këmbë të freskëta”, tha ai.
Southgate pranoi se Anglia ka ende shumë punë për të bërë për të përmirësuar performancën e saj. “Ka një punë të madhe para nesh, kjo është e dukshme nga dy shfaqjet që kemi dhënë dhe ne duhet të jemi të arsyeshëm. Ne e kuptojmë se njerëzit me të drejtë zhgënjehen nga paraqitjet tona. Ne duhet të luajmë më mirë”, përfundoi ai.
