Portugalia po avancon me rezultat 2-0 ndaj Turqisë pas pjesës së parë me ndeshjen që po zhvillohet në “Signal Iduna Park” të Dortmundit.
Portugezët e nisën më mirë takimin duke diktuar tempon e ndeshjes dhe duke mbajtur pothuajse gjatë tërë kohës posedimin e topit.
Golin e epërsisë ata e gjetën në minutën e 21-të me anë të Bernardo Silvës i cili shënoi për 1-0 duke e lënë pa ndonjë mundësi reagimi portierin turk.
Ky gol nuk mjaftoi dhe Portugalia e gjeti edhe të dytin vetëm disa minuta më vonë pas një autogoli të shënuar nga Samet Akaydin në minutën e 28-të.
Rastin më serioz Turqia e pati në minutën e 31-të me anë të Kerem Akturkoglut i cili pas një aksioni individual arriti të bëjë një gjuajtje të rrezikshme e cila u prit nga Diogo Costa.
Duke marrë parasysh atë që pamë në pjesën e parë duket pothuajse e pamundur për Turqinë që ta rikthejë këtë ndeshje në avantazhin e tyre, megjithëse futbolli ka befasi dhe mbetet të shihet.
Në rast fitoreje Portugalia automatikisht do të siguronte kualifikimin në mesin e 16 më të mirave në Euro 2024.
