Një polic 61-vjeçar ka humbur jetën sot dhe një tjetër është plagosur rëndë në një aksident trafiku teksa shoqëronte kryeministrin hungarez Viktor Orbán pas kthimit të tij nga ndeshja Hungari-Skoci në Kampionatin Evropian të Futbollit, raporton Reuters.
Incidenti ka ndodhur mëngjesin e sotëm pasi Orban ka parë mbrëmë fitoren e kombëtares ndaj Skocisë në Grupin A.
Njësia e motoçiklistëve të policisë rrugore të Shtutgartit po ndiqte Orbanin për në aeroport, kur shoferi 69-vjeçar i BMW-së, i pavetëdijshëm që kryqëzimi ishte i mbyllur për shoqëruesit, u përpoq të devijonte por u përplas me një oficer policie me motor.
Përplasja ka hedhur polic-motoçiklistin në motorin e kolegut të tij 27-vjeçar.
Polici 61-vjeçar ka ndërruar jetë nga plagët e marra në spital, ndërsa polici më i ri ka mbetur i plagosur rëndë.
“Jemi thellësisht të tronditur nga aksidenti i kolegëve tanë. Rrethanat tragjike të vdekjes së kolegut tonë të nderuar na lanë pa fjalë dhe goditën deri në palcë të gjithë forcën e policisë së Shtutgartit”, tha shefi i policisë Markus Eisenbraun në një deklaratë.
