Kryetari i Kuvendit të Kosovës, Glauk Konjufca, ka pritur në takim delegacionin e deputetëve të CSU-së të Parlamentit të Bavarisë, të drejtuar nga Gerhard Hopp, ku është diskutuar për thellimin e bashkëpunimit në shumë fusha. E po ashtu ligjvënësit bavarezë shprehën mbështetjen e tyre për anëtarësimin e Kosovës në strukturat euroatlantike, duke përfshirë Këshillin e Evropës, Bashkimin Evropian dhe NATO-n.
Në njoftimin për media, thuhet se kryetari i Kuvendit tha se Kosova ka një lidhje të veçantë me Gjermaninë, që është forcuar me kontributin e jashtëzakonshëm gjerman përgjatë të gjitha fazave, përpara dhe pas pavarësisë së shtetit tonë.
Kryetari Konjufca tha se Bavaria është nga rajonet që ka pritur emigrantët e parë shqiptarë nga Kosova në Gjermani, në vitet ‘60-të dhe për të gjitha këto Kosova ka mirënjohje të thellë, duke u siguruar që kjo lidhje të mbahet e palëkundur, si themel i bashkëpunimit.
Tutje në njoftim thuhet se bashkëbiseduesit u pajtuan që raportet mes Kosovës dhe rajonit të Bavarisë, si dhe Gjermanisë në përgjithësi, duhet të thellohen edhe më tej në një masë të gjerë fushash.
“Republika e Kosovës është veçanërisht e interesuar të përfitojë nga modeli i arsimimit profesional në rajonin e Bavarisë dhe shtetit të Gjermanisë në përgjithësi, përmes të cilit tregut të punës në Kosovë t’i ofrohet kuadër sa më profesional”, tha kryetari Konjufca.
Delegacioni gjerman u shpreh shumë i kënaqur me vizitën në Republikën e Kosovës, duke konstatuar të arriturat e shumta që Kosova i ka bërë si shtet.
