Presidenti malazez Jakov Milatoviq njoftoi se ai dhe presidenti kroat Zoran Milanović ranë dakord në bisedën e tyre se është detyrë e të dyja palëve që të kujtojnë me nderim të gjitha viktimat e Jasenovacit dhe të mos tregtojnë politikisht viktimat dhe krimin.
Milatoviq ka shkruar në rrjetin X se ka folur me Milanoviqin pasi në Parlamentin e Malit të Zi është miratuar rezoluta për gjenocidin në kampet Jasenovac, Dachau dhe Mauthausen.
“Ne ramë dakord se është detyra jonë e përbashkët që të kujtojmë me nderim të gjitha viktimat e gjenocidit në Jasenovac, dhe jo të tregtojmë politikisht viktimat dhe krimin, të cilin askush nuk e mohon dhe përvjetorët e të cilit janë shënuar zyrtarisht për dekada të tëra”, tha Milatoviq. .
Ai shtoi se në frontin e politikës së jashtme, përparësia e Malit të Zi janë marrëdhëniet e fqinjësisë së mirë dhe integrimi në BE.
“Republika e Kroacisë është fqinji ynë i parë i BE-së, ndaj duhet t’i kushtojmë vëmendje të veçantë ruajtjes së marrëdhënieve të mira reciproke”, ka shkruar Milatoviq.
Parlamenti i Malit të Zi, me iniciativën e së djathtës pro-serbe dhe proruse, miratoi të premten një rezolutë për gjenocidin në kampet Jasenovac, Dachau dhe Mauthausen.
Rezoluta u mbështet nga 41 nga 81 deputetë, ndërsa opozita dhe një pjesë e deputetëve në pushtet u larguan nga salla.
