Banorët e mbetur të fshatit Shipitullë të Obiliqit po kërkojnë të zhvendosen sa më shpejt nga zona ku jetojnë, pasi thonë se ekskavatorët e KEK-u po ua pamundësojnë jetesën.
Ata protestuan gjatë ditës para zyrave të KEK-ut dhe Ministrisë së Ekonomisë, por asnjë zyrtar nuk i pranoi në takim.
Jetesa në shtëpitë e tyre në fshatin Shipitullë të Obiliqit ju është bërë pothuajse e pamundur, andaj banorët e këtij fshatin të martën dolën në rrugë për të protestuar.
Para zyrave të KEK-ut ata kërkuan takim me zyrtarët e kësaj korporate për të biseduar rreth shpronësimeve në fshat.
“Nuk kemi ardhur me dhunë për të bërë ndonjë gjë. Nuk kemi ardhur të sulmojmë dikë. Kemi ardhur veç një ankesë që e kemi të kamotshme që ta shprehim. Ju kishim lutur dikush prej KEK-ut të dalë të na japë një përgjigje”, tha Musli Mjeku, banor.
Por askush nga ky institucion nuk iu përgjigj kësaj thirrjeje.
“Aty nuk ka shansë teorike për të jetuar, për shkak të zhurmës, pluhurit, për shkak të afërsisë së eskavatorëve, kanë filluar edhe shtëpitë të çahen, shkolla është mbyllur, rrugën na e kanë mbyllur dhe kemi mbet si një oazë”, tha Halil Mjeku, banor .
Protestuesit trokitën edhe në dyert e Ministrisë së Ekonomisë, por as aty nuk morën një përgjigje.
“S’do të ndalemi. Një ditë te një derë, një ditë te një derë tjetër. Bageri është sa te Hotel Grandi, 120 metra prej shtëpisë. Kemi pleq, kemi të sëmurë e fëmijë. I kemi edhe ne të drejtat tona, se jemi pjesë e kësaj Kosove”, tha Arsim Mjeku, përfaqësues i fshatit.
Familjet po kërkojnë të zhvendosen nga pjesa e mbetur e fshatit që nga viti 2017, kur fshati Shipitullë ishte shpronësuar për nevoja të Korporatës Energjetike të Kosovës.
