Përderisa operacionet e forcave izraelite në Rripin e Gazës vazhdojnë, është bërë e ditur, se grupet palestineze kanë arritur të lansjonë një barazh prej dhjetëra raketave drejtë territorit izraelit. Ndërkohë, hebrenjtë ultra-ortodoks kanë vazhduar me protesta kundër vendimit për mobilizimin e tyre në ushtri.
Edhe pse forcat izraelite po vazhdojnë me operacione intensive në pjesë të ndryshme të Rripit të Gazës, gati 9 muaj pas fillimit të luftës, e cila deri me tani ka shkaktuar rreth 40 mijë viktima, grupet militante palestineze ende po arrijnë të nisin sulme raketore ndaj Izraelit.
Zyrtarët izraelitë kanë bërë të ditur se grupet e armatosura palestineze kanë lansuar një barazh prej më shumë se 20 raketave drejtë territorit izraelit- sulmi më i madh i këtij lloji në muaj- sipas Tel Avivit, disa prej raketave u rrëzuan nga mbrojtja ajrore, përderisa të tjerat kanë rënë në Izraelin jugor, por pa shkaktuar lëndime.
Ky sulm, vije në kohën kur Izraeli paralajmëroi civilët në Khan Younis dhe rrethinë, që të largohen nga ajo pjesë e Rripit të Gazës, përderisa luftime dhe sulme ajrore janë raportuar, gati, në të gjitha pjesët e territorit, përfshirë Rafahun, Shejaiya-n, si dhe në vet qytetin e Gazës.
Ndërkohë, hebrenjtë ultra-ortodoks kanë vazhduar me protesta kundër vendimit të Gjykatës së Lartë, sipas të cilit, ata më nuk do të jenë të përjashtuar nga mobilizimi, i cili është i detyrueshëm për të gjithë qytetarët tjerë izraelitë. Mediumet izraelite kanë thënë se gjatë protestave të sotme, protestuesit kanë sulmuar policinë dhe veturën e ministrit të strehimit dhe ndërtimit Yitzhak Goldknopf.
