Në Komunën e Deçanit korrje-shirjet janë në vlugun më të madh. Lajmi i mirë është se sivjet rendimentet e grurit kanë qenë më të mirat në 10 vitet e fundit.
“Rendimentet këtë vit janë shumë më të mira se vitet e kaluara, 4500 – 5000 kg për hektar. Në përgjithësi mirë është duke shkuar. Unë si fermer i kam 2.5 hektarë, mirëpo në përgjithësi drithëra të bardha i kam diku 18 hektarë. Ka rritje edhe të subvencioneve, ajo po na shtyn se mos me qenë edhe qato s’di a kishim mundur me mbjellë”, ka thënë fermeri Qëndrim Shala.
Rifat Stojkaj, drejtor në DBZhR Deçan, ka thënë se sivjet sipas të gjitha analizave nga terreni mesatarja shkon deri në 5000 kg për hektar.
“Procesi i korrje-shirjeve në Deçan ka filluar rreth një javë më parë por tani ndodhemi në ditët vendimtare. Sivjet sipas të gjitha analizave që i kemi nga terreni mesatarja shkon deri në 5000 kg për hektar. Një rendiment i mirë që iu kanë përshtat të gjitha kushtet klimatike dhe punët e mira që fermerët tanë i realizojnë në terren”, ka thënë Stojkaj.
Çmimi i grurit, sipas fermerëve, sivjet është i ulët në raport me cilësinë e tij. Fermeri Idriz Shala, ka thënë se këtë vit nuk janë të kënaqur me çmimin e grurit.
“Unë i kam rreth katër hektarë grurë. Rendimenti është këtë vit shumë më i mirë se vitet tjera, por sivjet nuk jemi të kënaqur me çmimin e grurit sepse ky për me u mbjellë e me ardhur deri këtu te korrja është ardhur me një kosto shumë të lartë, ndërsa çmimi nuk është i mirë për grurin”, ka thënë Shala.
Sipas zyrtarëve për bujqësi, në Komunën e Deçanit janë rreth 700 hektarë grurë që pritet të korren deri më 20 korrik.
