Në 29-vjetorin e masakrës së Sbrenicës, me 84 për dhe asnjë kundër deputetët e Kuvendit të Kosovës kanë miratuar deklaratën mbështetëse të Rezolutës së OKB-së për gjenocidin e Srebrenicës.
Deklarata u lexua nga nënkryetari i Kuvendit, Bahrim Shabani, i cili tha se kjo ditë po bëhet ditë reflektimi mbi krimet që u kryen në Srebrenicë.
“Vlerësoj se caktimi i 11 korrikut si dita e përkujtimit dhe reflektimit të gjenocidit të 1995-s në Srebrenicë, të solidarizohemi me të mbijetuarit dhe përkujtimi për Srebrenicën të shërbejë si kujtesë e mprehtë e përgjegjësisë, për të parandaluar tragjedi në të ardhmen”, tha Shabani, para hedhjes në votim të deklaratës.
Para se të miratohet deklarata e rezolutës për ‘Gjenocidin e Srebrenicës’, fjalën e mori edhe zëvendëskryeministrja Emilia Rexhepi, e cila tha se me miratimin e kësaj rezolute bëjmë të ditur se ngjarje të tilla të mos përsëriten më, derisa falënderoi të gjithë vendet që kanë përkrahur popullin boshnjak. Ajo falënderoi edhe populli e Kosovës,institucionet e saj në mbështetjen e rezolutës në mbamendjen e gjenocidin në Srebrenicë.
Pas votimit të rezolutës përfundoi seanca e jashtëzakonshme e Kuvendit të Kosovës që iu kushtua gjenocidit në Srebrenicë.
Kuvendi nis seancën me një minutë heshtje për Srebrenicën
Kuvendi i Kosovës nisi sot seancën e parë të jashtëzakonshme, e cila i kushtohet përkujtimit të viktimave të Gjenocidit në Srebrenicë, në 29 vjetorin e saj.
Seanca ka filluar me një minutë heshtje, për nder të viktimave të masakrës së Srebrenicës.
Për shkak të punimeve në sallën e seancave të Kuvendit, seancat po mbahen në një sallë tjetër.
Kujtojmë se Bosnja dhe Hercegovina shënon 29-vjetorin e masakrës së Srebrenicës. Më 11 korrik të vitit 1995, forcat serbe të Bosnjës hynë në Srebrenicë, në zonën që ishte shpallur e sigurt nga Kombet e Bashkuara. Në ditët që pasuan, ato vranë mbi 8 mijë burra dhe djem myslimanë, ndërsa trupat e tyre i hodhën në gropa në pyjet përreth.
