1,589,659 banorë është numri i popullsisë në Kosovë, sipas procesit të regjistrimit nga Agjencia e Statistikave të Kosovës. Nga ta janë 795,046 meshkuj dhe 791,614 janë femra. Këto shifra përfshijnë vetëm banorët vendorë dhe jo diasporën. Nga gjithsej 38 komuna të Kosovës, 9 prej tyre kishin rritje të popullsisë, 29 të tjera kishin zvogëlim të numrit të popullsisë.
Mosha mesatare në Kosovë është 34 vjet. Ka një rritje të moshës për 4.85 vjet, ku në regjistrimin paraprak gjatë vitit 2011 mosha mesatare ishte 29 vjet.
“Vendet e regjionit kanë një moshë mesatare 40 vjet. Për Kosovën kjo është një e mirë dhe është një momentum demografik dhe kjo i bie se do ta kemi moshën më të re në Evropë”, ka thënë ushtruesi i detyrës së drejtorit të Agjencisë së Statistikave të Kosovës, Avni Kastrati përgjatë prezantimit të të dhënave të regjistrimit.
Sa i përket piramidës së popullsisë, tashmë dominon mosha 20 deri 24 vjeç, teksa në vitin 2011 dominonte grupmosha 10 – 19vjeç.
Kastrati ka thënë se mbi 99,8% të objekteve të kodifikuara, duke përfshirë edhe të rejat, janë mbuluar në proces. Për periudhën 2011 – 2023, popullsia është shtuar 203, 294 banorë duke shkuar në shtim pozitiv. Ndërkaq të dhënat tregojnë se ka rënie të përgjithshme të popullsisë.
Fushë Kosova, Mamusha e Prishtina – komunat me dendësinë më të madhe
“Në 4 komunat në veri të vendit pati bojkotim në masë të madhe, përkundër se është regjistruar një pjesë e popullsisë”, ka thënë ai.
Tri komunat me dendësinë më të madhe dalin të jenë Fushë Kosova me 762 banorë, Mamusha me 513 banorë, Prishtina me 434 banorë. Ndërkaq dendësinë më të vogël e kanë Novobërda, Ranillugu dhe Shtërpca.
