Pas vendimit të Qeverisë për shpronësimin e pronave për zgjerimin e rrugës Kijevë-Zahaq, segmenti i Dollcit, banorët e këtij lokaliteti janë shprehur të kënaqur me vlerën e kompensimit, por të pakënaqur me devijimet që i ka bërë Ministria e Infrastrukturës në vende të caktuara. Njëri që po ndërton një fabrikë në këtë zonë, thotë se nëse ndodh shpronësimi i parashikuar do t’ia dëmtojë investimin milionësh.
Në objektin e paraparë për fabrikë, Salih Kalludra nga Gremniku i Klinës, thotë se së bashku me familje e tij kanë investuar mbi 1 milion euro.
Mirëpo vendimi për t’ia shpronësuar vetëm 65 cm brenda objektit nga Ministria e Infrastrukturës, duke mos shfrytëzuar alternativa, e ka shqetësuar jashtëzakonisht Kalludrën.
Ai thotë se nëse vazhdohet me shpronësimet e parapara, po i prishen planet për ndërtimin e fabrikës.
Për më tepër, Kalludra ka sqaruar se me kohë është në organet kompetente, por deri tani askush ia ka sqaruar problemin. Ai është i vendosur se në këto rrethana pa një marrëveshje paraprake, nuk do t’i lejojë punimet.
Një njoftim rreth shpronësimeve, thotë se e ka edhe një banor i kësaj ane. Naim Krasniqi, ka thënë se e ka marrë një njoftim sa për sy e faqe.
“Normal që pronat dhe bizneset i preke, edhe biznesin tonë por edhe të tjera. Edhe krejt çka mund të them se kishte me qene mire që Ministria me ardhë e me u taku me pronarë para se me u ba projekti detal e jo pasi të kryhet puna e hajde po shkojmë po bisedojmë”, ka thënë Krasniqi për RTK.
Rreth pretendimeve të banorëve, RTK ka kërkuar përgjigje nga Ministria e Infrastrukturës, por zyrtarët e saj nuk janë përgjigjur.
