Policia e Malit të Zi ka reaguar ndaj informacionit të publikuar nga mediat malazeze se Gjukanoviqi është informuar se ndaj tij po përgatitet një atentat.
“Administrata policore nuk ka dijeni për informacionin e publikuar të cilin e ka konfirmuar edhe kabineti i ish-presidentit të Malit të Zi. Theksojmë se ish-presidenti i Malit të Zi, Milo Gjukanoviq, si dhe ‘zyrtarë të caktuar ndërkombëtarë nga komuniteti i inteligjencës’ nuk e ka informuar administratën policore të Malit të Zi, se një grup i organizuar kriminal nga shteti fqinj dyshohet se po planifikon të kryejë një atentat, në bashkëpunim me shërbimet e sigurisë të një shteti tjetër fqinj”, thuhet në reagimin e policisë malazeze, raporton RTCG.
Gazeta “Vjesit” ka shkruar se një burim i afërt me Gjukanoviqin ka thënë se një zyrtar i lartë ushtarak i huaj nga Kosova e ka informuar atë se një grup i organizuar kriminal nga një shtet fqinj dyshohet se po planifikonte të kryente një atentat, në bashkëpunim me shërbimet e sigurisë të një vendi tjetër fqinj.
“Ish-presidenti i ka marrë informacionet e lartpërmendura nga disa zyrtarë ndërkombëtarë nga komuniteti i inteligjencës dhe me atë informacion ka njoftuar autoritetet shtetërore”, thuhet në përgjigjen e zyrës së Gjukanoviqit për “Vijesti”.
Zyra nuk ka treguar se kush dhe kur i janë dhënë këto informacione Gjukanoviqit. Duke iu përgjigjur pyetjes se a është rritur siguria e Gjukanoviqit, zyra e tij ka njoftuar se ajo është reduktuar.
“Ndryshimet e sigurisë kanë ndodhur deri në atë masë sa që siguria në vendbanimin e ish-presidentit është hequr gjatë ndërrimit të ditës”, thuhet në përgjigje.
Sipas zyrës së Gjukanoviqit, ish-presidenti nuk është ftuar për intervistim nga shërbimet malaziase të sigurisë. 62-vjeçari ishte president i Malit të Zi nga 2018-ta deri më 2023. Njihet për qëndrimet pro-Kosovës.
