Qeveria e Kosovës, duke u bazuar në rekomandimet e IKShPK-së për shkak të temperaturave të larta, ka marrë vendim që të ndalojë punën në ndërtimtari, nga ora 11:00 deri në 17:00. Por, sipas Sindikatës së Re të KEK-ut, ky vendim nuk po zbatohet tek punëtorët e KEK-ut, ku për të siguruar energji duhet të punojnë gjithë ditën, edhe në diell.
Sindikata e KEK-ut, për RTKlive ka konfirmuar edhe sot se puna po ndodh me të njëjtin ritëm, ndërsa KEK nuk është përgjigjur në interesimin e RTK-së për këtë çështje.
E me këtë rast, Sindikata Re të KEK-ut, u ka drejtuar një kërkesë urgjente Menaxhmentit dhe Bordit të KEK-ut.
“Përkundër kushteve të vështira dhe temperaturave të larta, punëtorët e KEK-ut vazhdojnë të punojnë pa ndalur për shkak të urgjencës për prodhimin e thëngjillit dhe mbajtjen në punë të termocentraleve. Ne, Sindikata e Re e KEK-ut, kemi kërkuar që të stimulohen punëtorët e KEK-ut, duke u bazuar në kushtet e rënda dhe rrezikshmërinë në punë, inflacionin, si dhe prodhimin stabil ne ketë kohë me temperatura të larta”, thuhet në reagim.
Kjo sindikatë ka hartuar një kërkesë prej 3 pikave drejtuar strukturave menaxhariale dhe drejtuese të KEKU-ut.
“Kërkojmë: 1. Plotësimin e kushteve të punës: për të siguruar shëndetin dhe sigurinë e punëtorëve: Ujë për pije, frigorifer dhe klima nëpër konvenjera; 2. Stimulimin financiar për të gjithë punëtorët e KEK-ut, duke marrë parasysh rrezikshmërinë e lartë të punës dhe kushtet e vështira në të cilat operojnë; 3. Rritjen e pagave për të kompensuar efektet e inflacionit dhe për të njohur përpjekjet e vazhdueshme të punëtorëve në mbajtjen e prodhimit stabil. Këto masa janë të domosdoshme për të siguruar mirëqenien e punëtorëve dhe për të garantuar vazhdimësinë e prodhimit të energjisë në këtë periudhë kritike. Sindikata e Re e KEK-ut”, thuhet në reagim.
