Këshilli Evropian ka miratuar sot (15 korrik) 13 milionë euro ndihmë për Forcat e Armatosura Shqiptare.
Ndihma vjen në kuadër të Fondit Evropian të Paqes, ndërsa shefi i Politikës së Jashtme dhe të Sigurisë së BE-së, Josep Borrell, e konsideroi vendimin si një moment “historik” dhe të rëndësishëm në bashkëpunimin e Shqipërisë me BE-në për sigurinë dhe mbrojtjen.
“Shqipëria është një partner i besueshëm i sigurisë dhe vend kandidat për në BE. Vendimi i sotëm është një moment historik i rëndësishëm në bashkëpunimin tonë për sigurinë dhe mbrojtjen. Ai pasqyron gjithashtu vlerësimin tonë për përafrimin e plotë të Shqipërisë me Politikën e Përbashkët të Jashtme dhe të Sigurisë të BE-së, e cila është një shprehje shumë e qartë e zgjedhjes strategjike të Shqipërisë për një të ardhme brenda BE-së”, shkruan Borrell.
Kjo ndihmë synon rritjen e efektivitetit operacional të Forcave të Armatosura shqiptare, veçanërisht në drejtim të lëvizshmërisë, manovrimit dhe mbrojtjes.
Sipas Këshillit Evropian, Forca Tokësore Shqiptare do të marrë mjete të lehta të blinduara shumëfunksionale, për lëvizshmëri dhe manovrim të lartë në të gjitha llojet e terrenit dhe kushteve të motit dhe për të siguruar mbrojtjen e personelit kundër armëve të lehta dhe eksplozivëve.
