Një 22-vjeçar serb është arrestuar pasi vrau me thikë ish-shefin e dizajnit të Rolls-Royce, Ian Cameron, 74 vjeç, në hyrje të shtëpisë së tij në Herrsching am Ammersee, Bavari, të premten e kaluar.
Pas vrasjes, 22-vjeçari u arratis përmes Mynihut, Innsbruck dhe Cyrihut në Aubervilliers në veri të Parisit. Forcat speciale franceze e arrestuan ditën e djeshme në banesën ku ndodhej. Sipas informacioneve fillestare, ai nuk ka bërë rezistencë ndaj arrestimit. Ai duhet të dalë sot para gjyqtarit hetues.
Ende nuk dihet motivi i vrasjes dhe jozyrtarisht Bild mësoi se vrasësi nuk ka vjedhur asgjë në shtëpinë e viktimës. Bashkëshortja e viktimës ka arritur të arratiset dhe të lajmërojë policinë nga një shtëpi aty pranë. Me të mbërritur në vendngjarje efektivët e policisë kanë gjetur trupin e viktimës, ndërsa vrasësi është arratisur ndërkohë.
Është regjistruar nga kamerat e vëzhgimit
Shumë shpejt pas krimit u nis një kërkim i madh, ku përfshiheshin qen kërkimi, helikopterë dhe policë të shumtë. Kërkimi fillestar ishte i pasuksesshëm. Die Welt shkruan se vrasësi ishte duke lëvizur nëpër Herrsching në orët para vrasjes, ndaj është regjistruar nga kamerat e vëzhgimit.
Policia publikoi shpejt një foto të vrasësit bazuar në pamjet nga kamera e mbikëqyrjes së supermarketit. Sa i përket provave, në shëtitoren buzë liqenit u gjet çanta e kuqe e shpinës së vrasësit dhe në pyllin aty pranë thika e kryer për krimin.
“Është shumë e rrallë që dikush t’i bie ziles, të sulmojë një qiramarrës dhe më pas ta godasë me thikë”, tha oficeri i policisë për Bild. Ai shpjegoi se në raste të tilla zakonisht ka ndonjë marrëdhënie të mëparshme mes dhunuesit dhe viktimës.
