Banka të mëdha, mediume, kompani për telekomunikime dhe kompani ajrore në gjithë botën janë duke u përballur me ndërprerje masive të internetit dhe bllokim të kompjuterëve.
Ka raportime që sugjerojnë se kompania për siguri kibernetike, Crowdstrike, e cila krijon softuerë kundër viruseve kompjuterike, e ka nisur një përditësim që ka shkuar shumë keq dhe është duke prekur pajisjet Windows.
Aeroplanët janë ulur në Sidnej, Shtetet e Bashkuara i kanë pezulluar fluturimet, ndërsa platforma e bursave në Londër, ka raportuar për probleme me internet për pak minuta.
Televizioni britanik Sky News ka qenë për pak kohë jashtë transmetimit.
Policia në shtetin amerikan të Alaskës ka raportuar për bllokim të linjës për emergjenca – 911.
Shkaku i gjithë këtyre problemeve nuk dihet ende.
