Qeveria e re e Maqedonisë së Veriut pritet ta mbështesë ndërtimin e tunelit që lidh Tetovën me Prizrenin. Kështu kanë bërë të ditur strukturat e reja qeveritare të koalicionit VLEN. Sipas tyre, në seancat e para të Kuvendit pritet të miratohet projektligji për ratifikimin e marrëveshjes për bashkëfinancim të projektit.
Në njërën prej seancave të para të Kuvendit të Maqedonisë do të miratohet projektligji për ratifikimin e marrëveshjes së bashkëfinancimit të projektit për ndërtimin e tunelit në rrugën Tetovë-Prizren. Kështu premtuan udhëheqësit e koalicionit VLEN, të cilët janë bërë pjesë e Qeverisë në Shkup, derisa takuan kryetarin e Tetovës.
“Ky projekt është i rëndësishëm jo vetëm për Tetovën,por për gjithë Maqedoninë e Veriut sepse e afron vendim më afër jo vetëm me Kosovën ,me zonën e Prizrenit ,por edhe me Shqipërinë Veriore dhe bregdetin shqiptar”, tha për RTK Bilall Kasami, Kryetar i komunës së Tetovës.
Edhe zëvendëskryeministri i parë i Maqedonisë së Veriut, Izet Mexhiti, tha se në takimet që ka realizuar me autoritetet në Kosovë ka biseduar për ndërtimin e kësaj rruge.
“Pala kosovare punon intensivisht, ne edhe pse imi në ditët e para, pa u ul mirë ne kemi shku në Kosovë dhe kemi shku në Prishtinë pikërisht për këto tema”, tha Mexhiti.
Hapja e rrugës që do ta lidhte Tetovën me Prizrenin po mirëpritet nga banorët, duke u konsideruar si projekt me rëndësi të veçantë.
“Të hapet sa më shpejtë, të rregullohet dhe ti lidh të dy qytetet”, shprehet një qytetar.
“Mendoj se është një projekt i qëlluar. Aty kanë leverdi dhe fitojnë të gjithë shqiptarët. Lidhet rruga dhe prej 20-30 do jesh në Prizren e pi një kafe dhe kthehesh në Tetovë, ku ka më mirë”, thotë një tjetër qytetar i Tetovës.
Me ndërtimin e këtij aksi, rruga Tetovë-Prizren, nga rreth 3 orë sa është aktualisht, do të mund të kalohet për rreth 35 minuta.
