Disa zyrtarë të Njësisë për patentë shoferë në Pejë janë arrestuar mëngjesin e sotëm, më 23.07.2024.
Kështu ka thënë zëvendësministri i Infrastrukturës, Hysen Durmishi, përmes një video adresimi.
Durmishi ka deklaruar se rastet për të cilat janë arrestuar sot zyrtarët janë denoncuar me kohë.
“Më 02.02.2024 kemi mbajt edhe një konferencë për media ku i kemi paraqitur të gjitha të gjeturat tona që kanë të bëjnë me krimin dhe korrupsionin në njësinë për patentë shoferë në Pejë”, tha zëvendësministri.
Ai ka falënderuar organet e drejtësisë për veprimet të cilat janë marr nga ana e tyre deri më tani.
“Shpresoj dhe besoj që kjo çështje do të shkoj deri në fund dhe të gjithë ata të cilët kanë qenë të përfshirë do të marrin dënimin e merituar, ne jemi të pakompromis në luftën ndaj krimit dhe korrupsionit”, ka shtuar Durmishi.
Ai paralajmëroi se gjatë ditës do ta bëj edhe një vizitë në Qendrën për patentë shoferë në Pejë për të parë punën që po zhvillohet aty.
