Ish-ambasador i Kosovës dhe ish-kreyenegociator në dialogun me Serbinë, Avni Arifi në ‘Lajmet e fundit’ k folur për situatën politike e të sigurisë në vend.
Ish-ambasador i Kosovës dhe ish-kreyenegociator në dialogun me Serbinë, Avni Arifi në ‘Lajmet e fundit’ ka thënë se vendimin e BE-së për vizat për pasaportat ilegale serbe, është reflektim i pozicionit të Kosovës karshi vendeve perëndimore.
“Kosova ka humb çdo kredibilitet të BE. Kjo lexohet në formën që Kosova nuk ka arritur të bëjë mjaftueshëm integrimin e komunitetit serb”, ka thënë Arifi për RTK
Sipas tij, qeveria është dashur të bëjë të ditur numrin e serbëve që pajisen me pasaporta të Kosovës.
Arifi ka thënë se raportet e Kosovës me partnerët ndërkombëtarë, kurrë nuk kanë qenë më të këqija. Ndërsa për Asociacionin, ai ka theksuar se shkathtësia e çdo qeveria do të ishte të bëhet një draft-statut që akceptohet nga SHBA-ja, që do të mund të zvogëloheshin dëmet.
Ish- kryenegociatori duke folur për situatën e sigurisë në vend u përqendrua në intervistimin e ministres së Drejtësisë, Albulena Haxhiu, për deklarimet e saj për sistemin e drejtësisë, por edhe për sigurinë në burgjet e Kosovës.
Intervistimin e ministres Haxhiu nga Prokuroria dhe mos-aftësia e artikulimit dhe argumentimit të akuzave nga ana e saj, Arifi vlerëson si anormale.
“Ministrja e konsideron veten si një organ suprem, i cili vendos se çka është mirë dhe çka është keq. Cili vendim është i mirë i gjykatave dhe cili vendim është i keq”, ka thënë Arifi.
Ai më tej vuri në pah se deklarata e saj lidhur me ikjet nga burgjet nuk mund të interpretohet ndryshe pos, siç u shpreh Arifi, si një akuzë se burgjet e Kosovës janë nën ndikimin e shtetit serb. Kjo, sipas tij, nuk është një praktikë e mirë dhe nuk i shërben sundimit të ligjit.
Arifi tha se pjesa më e rëndë e deklaratës së ministres Haxhiu është se puna e saj po i penguaka Prokurorisë.
“T’i shpallësh luftë Prokurorisë dhe ta sulmosh në këtë formë, nuk është praktikë demokratike që ndodhë në ndonjë vend”, ka deklaruar Arifi.
Arifi rikujtoi nënshkrimin e tre krerëve të Kosovës drejtuar Këshillit të Evropës, në të cilën janë zotuar se nuk do të ketë ndërhyrje në sistemin e drejtësisë.
