Rrahman Paçarizi, profesor universitar dhe analist politik, në ‘Lajmet e fundit’, ka folur për zhvillimet politike në vend, si dhe për mediat dhe sfidat e tyre, veçmas lidhur me situatën rreth RTK-së pas publikimit të lajmit të djeshëm marrë nga ‘Slobodna Bosna’.
Sipas tij, sulmet ndaj RTK-së janë thuajse normale, sepse bëhet fjalë për një medium publik, i cili financohet nga qytetarët e Kosovës dhe ndaj të cilit kanë të drejtë të kërkojnë llogari që të gjithë.
“Mendoj se kjo situatë është fatkeqe, e cila do të përdoret e të keqpërdoret. Mendoj se involvimi i partisë në pushtet në këtë çështje, gjitha përpjekjet e tyre për ta mbrojtur RTK-në është pjesë që i bën dëmin më të madh, pikërisht RTK-së”, tha Paçarizi.
Lidhur me veprimin e Bordit të RTK-së për këtë çështje, Paçarizi tha se duhet pasur kujdes në cilësime mbi atë se çfarë është presion e çfarë jo.
“Bordi i RTK-së mund të ndërmarrë masa drejtpërdrejtë ndaj atyre të cilët i ka zgjedhur, por jo edhe në mikromenaxhim”, deklaroi Paçarizi, teksa shtoi se ai organ mund të konstatojë nëse ka pasur shkelje, nëse ka pasur shkarje nga politika editoriale,etj.
“Bordi duhet të bëjë presion që situata të sqarohet”, theksoi ai.
Paçarizi tha se lajmi i publikuar në RTK ka qenë më tepër se kontrovers, ngase sipas tij, është dashur që së paku të kontaktohen personat e apostrofuar në atë lajm, sepse, sipas Paçarizit përmes atij lajmi janë goditur medie e kolegë gazetarë.
Megjithatë ai tha se Bordi nuk duhet të veprojë nën presion të reagimeve nga OJQ-të, ndonëse pati reagim edhe nga OSBE-ja që e ka përgëzuar veprimin e shpjet të Bordit.
Vendimi i Bordit për ta themeluar një komision ‘ad hoc’ për këtë çështje, sipas Paçarizit është një qasje e duhur, sepse sipas tij, nuk duhet të jetë synimi të sulmohet RTK-ja e as individët e veçantë, derisa shtoi se “përshtypjen se ka qenë një gabim po e japin eksponentë të pushtetit, të cilët janë vënë gjoja në mbrojtje të RTK-së, e cila nuk ka nevojë as të mbrohet e as të sulmohet nga pushteti.
Ai kritikoi thirrjet e tipit që të mbyllet RTK-ja, etj. “Mbyllja e RTK-së do të ishte fatale për demokracinë në vend”, theksoi Paçarizi.
