Rrjeti i OJQ-ve AVONET ka shprehur shqetësimin në lidhje me gjuhën e përdorur në faqen zyrtare të Komunës së Ferizajt.
Sipas tyre, kjo faqe paguhet nga taksat e qytetarëve dhe si e tillë duhet të reflektojë profesionalizëm, të shërbejë për çështje institucionale dhe jo interesa të individëve të caktuar.
AVONET në deklarimin për media i bën thirrje kryetarit të komunës së Ferizajt që të ndërmarrë masa për të parandaluar diçka të tillë dhe të respektojnë standardet e komunikimit.
Reagimi i plotë:
Rrjeti i OJQ-ve AVONET shprehim shqetësimin lidhur me gjuhën e përdorur në faqen zyrtare të Komunës së Ferizajt. Këto faqe, të cilat janë financuar me taksat e qytetarëve, duhet të reflektojnë profesionalizëm dhe të shërbejnë për çështje institucionale, dhe jo për interesa të zyrtarëve të caktuar.
Fatkeqësisht, kemi vërejtur se disa nga reagimet dhe postimet në faqen zyrtare të Komunës së Ferizajt përdorin një gjuhë jo institucionale. Këto veprime janë shqetësuese dhe janë në kundërshtim me standardet e pritshme të komunikimit institucional. Gjuha dhe tonet e përdorura në këto reagime nuk janë në përputhje me nevojën për profesionalizëm dhe transparencë që kërkohet nga një institucion publik.
Ne i bëjmë thirrje Kryetarit të Komunës së Ferizajt që të ndërmarrë menjëherë masa për të ndaluar përdorimin e gjuhës jo të përshtatshme në faqet e Komunës. Personat përgjegjës për redaktimin dhe aprovimin e këtyre reagimeve duhet të jenë të vetëdijshëm se ata përfaqësojnë interesat e qytetarëve.
Është e rëndësishme që çdo përfaqësues institucional të respektojë standardet e komunikimit dhe të përdorë faqen zyrtare vetëm për çështje institucionale. Çdo lloj komunikimi tjetër apo i pasinqertë, mund të publikohen në rrjetet sociale dhe faqet personale të individëve, por nuk është e pranueshme që ato të shfaqen në faqet zyrtare të institucioneve publike.
Për të ruajtur besimin e qytetarëve dhe për të siguruar një komunikim të qartë dhe profesional, kërkojmë nga Kryetari i Komunës së Ferizajt që të përmbushë këto standarde dhe të marrë masat e nevojshme për të parandaluar përsëritjen e këtyre problemeve në të ardhmen. /Kosovatimes/
