Ministri i Brendshëm në detyrë, Taulant Balla, ka mbërritur pasditen e sotme në Shëngjin ku situata vijon të jetë problematike për zjarret ku deklaroi se është kërkuar edhe ndihma e KFOR-it.
Pas ndërhyrjes nga ajri me dy avionë Canadair të ardhur nga Italia, Balla theksoi se është në kontakt me KFOR-in për të marrë edhe helikopterët e tyre në mënyrë që të vendosen nën kontroll flakët që kanë përfshirë Shëngjinin.
“Jemi në kontakte me KFOR për të marrë helikopterët e tyre. Në rast se ndalet era dhe parashikohet të ndalet në mesnatë, gjëja do ndryshoj për mirë. E gjitha punë jonë është e pamundur të jap rezultatin që duam. Kjo është një përmbledhje e momentit. Po luftohet më shumë se 24 orë pa ndërprerje. Dhe na duhet një pjesë e zjarrfikësve në vende ku shfaqen vatrat e reja të zjarrit. Aktualisht në Shëngjin janë 5 vatra aktive”, u shpreh Balla.
Gjithashtu Balla bëri të ditur se ka pasur komunikim edhe ministrin slloven për të kërkuar ndihmë ndërsa theksoi se janë 5 vatra aktive që duhen shuar. Ndërsa shtoi se sipas vlerësimit të policisë nuk kemi të bëjmë me një zjarrvënie të qëllimshme.
“Kam pasur një komunikimin me ministrin slloven, ata kanë mundësinë dhe kapacitet të mbështesin. Ministri i Mbrojtjes është në kontakt me KFOR për të sjellë helikopterët në këtë operacion në vështirë. Në rast se ndalet era, gjëja do të ndryshojë për mirë. Në kushtet e kësaj ere, e gjithë puna jonë është e pamundur të japë rezultatin që duam të gjithë. Mos harrojmë që këtu po luftohet prej më shumë se 24 orë pa ndërprerë dhe na duhet që një pjesë e zjarrfikësve t’i spostojmë në vatrat e tjera të zjarrit. Janë 5 vatra aktive. Sipas vlerësimit paraprak të Policisë, nuk kemi të bëjmë me një zjarrvënie të qëllimshme”, shpjegoi Balla.
