Instituti Kombëtar i Shëndetësisë Publike i Kosovës (IKShPK) ka dhënë këshilla për kujdes nga kafshimi i gjarprit.
“Shumica e gjarpërinjve nuk janë të rrezikshëm për njerëzit. Vetëm rreth 15 % e gjarpërinjve në mbarë botën mund të injektojnë helm kur kafshojnë. Këta gjarpërinj quhen helmues. Megjithatë, kafshimet e gjarpërinjve mund të shkaktojnë lëndime serioze dhe ndonjëherë vdekje”, njofton IKShPK.
Po në njoftim bëhet me dije se në Kosovë deri tani jetojnë katër lloje të gjarpërinjve, ndër ta edhe lloji helmues Vipera ammodytes (gjarpri i gurit, nepërka).
“Nëse ju kafshon një gjarpër helmues, telefononi menjëherë në numrin 194, familjarët ose të afërmit tuaj, sidomos nëse zona e kafshuar nga gjarpri ndryshon ngjyrën, fryhet ose është e dhimbshme”, njofton Instituti.
IKShPK ka bërë me dije edhe simptomat.
“Shumica e kafshimeve të gjarpërinjve ndodhin në krahë, kyçe ose duar. Simptomat tipike të një kafshimi johelmues janë dhimbja, lëndimi dhe gërvishtjet në vendin e kafshimit.
Pas një kafshimi helmues, zakonisht ka dhimbje serioze dhe ndjeshmëri në vendin e kafshimit. Kjo mund të përkeqësohet në ënjtje dhe mavijosje”, thuhet në njoftim.
IKShPK ka njoftuar edhe për simptoma të tjera.
“Të përziera, frymëmarrje e vështirësuar dhe ndjenja e dobësisë, si dhe një shije e çuditshme në gojë. Ndonjëherë një gjarpër helmues mund të kafshojë pa injektuar helm. Kjo quhet pickim i thatë. Nëse është e mundur, ndërmerrni sa më parë disa hapa derisa t’ju jepet ndihma e parë mjekësore”, thuhet në njoftim.
