Shërbimi Spitalor Klinik Universitar i Kosovës (ShSKUK) ka njoftuar se ka shënuar rritje numri i rasteve të foshnjeve që kanë lindur para kohe dhe që kanë pasur nevojë për trajtim pas lindjes në Klinikën e Neonatologjisë të Qendrës Klinike dhe Universitare të Kosovës.
“Nga 1 janari deri më tani në këtë klinikë janë trajtuar 430 foshnja, numër ky në rritje krahasuar me vitet e tjera”, thuhet në njoftim.
Më tutje, ShSKUK ka bërë me dije se këto foshnja janë trajtuar për Asfiksion Perinatal (mungesë e oksigjenit para dhe pas lindjes), prematuritet (lindje para kohe), me komplikime, anomali të ndryshme kirurgjike, neonatale, anomali neurokirurgjike, e që trajtohen para dhe pas operimit të tyre, dhe infeksione të ndryshme.
Sipas njoftimit, stafi i klinikës me sukses po trajton edhe rastet e prematurëve (foshnjet e lindura para javës së 36 të shtatëzanisë) deri tek prematurët me peshë ekstreme të lindjes, 500-999 gramë.
“Raste të tilla janë të predispozuar ndaj shumë komplikimeve për shkak të papjekurisë së gjithë sistemeve. Trajtimi bëhet sipas protokolleve bashkëkohore, duke filluar që nga dhënia e kortikoideve nga ana e gjinekologë-obstetërve, deri te mbështetja respiratore, joinvazive dhe invazive”, njofton ShSKUK.
Tutje ky institucion thekson se një nga manifestimet e prematuritetit (lindjes para kohe), është edhe kriza e apnesë (ndërprerja e frymëmarrjes). Këto foshnje trajtohen me CPAP, në të tilla raste ndihmon ampula caffeine citrate, por jo të gjithë rastet kanë nevojë për këtë lloj trajtimi. Në disa raste, përveç Caffeine Citrate, përdoret ampula Aminophylinë, si terapi alternative.
“Foshnje të lindura para kohe, prej javës 28 deri 33, të shtatëzanisë dhe që kanë manifestuar kriza të apnesë, kanë qenë 175, e që janë trajtuar me Caffeine Citrate, ose Ampula Aminophylinë. Ndërsa foshnja të lindura prej javës 34 deri në 36 të shtatëzanisë kanë qenë 255, ku prej tyre 50 foshnja kanë pasur përkrahje me Caffeine Citrate ose Ampula Aminophylinë. ShSKUK ka siguruar të dy ampulat, por për shkak të shpenzimit përtej planifikimit, Ampula Caffeine Citrate ka munguar disa ditë, e që është zëvëndësuar si alternativë me Ampulën Aminophylinë”, thuhet tutje në njoftim. /Kosovatimes/
