Kompania që operon me aeroportet në Maqedoninë e Veriut, TAV, ka dalë me një reagim lidhur me incidentin e sotëm ku sipas Presidencës së Kosovës, zyrtari i aeroportit ka tentuar të ia marrë telefonin personal presidentes Osmani e më tej ka tentuar edhe ta shtyjë fizikisht atë.
Në reagim thuhet se TAV e ka obligim ligjor që të kryejë një kontroll sigurie të të gjithë pasagjerëve, bagazheve dhe mallrave.
“Në përputhje me Ligjin për Aviacion dhe rregulloren juridike ndërkombëtare që i referohet sigurisë së aviacionit civil, TAV Maqedoni si operator i aeroportit ka obligim ligjor që të bëjë kontroll të sigurisë të të gjithë pasagjerëve, bagazheve dhe mallrave në fluturimet nga Aeroporti Ndërkombëtar i Shkupit dhe nga Aeroporti Shën Apostol Pavle Ohër, duke përfshirë pasagjerët që udhëtojnë nëpër sallonin VIP. Prandaj, Departamenti i Sigurisë i TAV Maqedoni, në kuadër të kompetencave të veta, ka bërë kontroll standard të sigurisë së pasagjerit të përmendur si dhe bagazhit të tij, në pikën e kontrollit të sigurisë në sallonin VIP, për të siguruar fluturimin specifik komercial”, thuhet në reagim.
Duam të theksojmë se siguria e aviacionit nuk është kërcënuar, sepse ngjarja e përmendur ka ndodhur në hapësirën publike të aeroportit, pra përballë pikës së kontrollit të sallës së VIP-ave, nga ku pasagjerët VIP, pasi janë kontrolluar nga sigurimi, dërgohen në zonën e kontrolluar nga aeroporti. Gjithashtu duam të theksojmë se salla e VIP-ave është një ndërtesë e veçantë e izoluar nga ndërtesa kryesore e terminalit të Aeroportit të Shkupit, që do të thotë se është plotësisht e pasaktë se është cenuar siguria e udhëtarëve”, përfundon kumtesa e lëshuar nga TAV.
