Partia Aleanca për Shqiptarët e Maqedonisë Veriore dënon ashpër siç thonë ata provokimin e rëndë ndaj Republikës së Kosovës, përmes sjelljes skandaloze të zyrtarëve të Aeroportit të Shkupit ndaj Presidentes Vjosa Osmani, duke kërkuar që të mbahet përgjegjësi dhe të kërkojë falje Qeveria e Maqedonisë së Veriut.
“Kërkojmë urgjentisht që autoritetet kompetente të hetojnë dhe të sanksionojnë të gjithë personat përgjegjës për këtë sulm skandaloz ndaj autoritetit të Presidentes së Kosovës, duke shkelur të gjitha protokolet dhe konventat ndërkombëtare”, thuhet në reagimin e tyre dërguar në një komunikatë për media.
Sipas tyre qeveria e VMRO-së përmes vasalëve të VLEN, duke mos u mjaftuar me degradimin që u kanë bërë shqiptarëve në RMV, tani tentojnë që të nënçmojnë dhe ofendojnë edhe Kosovën, madje deri edhe Presidenten e Republikës së Kosovës.
Tutje në reagim thuhet se për ta ky rast nuk është një incident i thjeshtë, por një provokim i rëndë për të cilin duhet të mbajnë përgjegjësi dhe të kërkojnë falje nga i pari i Qeverisë, deri tek personat që kanë qenë pjesëmarrës në këtë rast. /Kosovatimes/
