Tenori me famë botërore, Ramë Lahaj, ka deklaruar se nuk do të ndalojë së bërë presion ndaj Qeverisë dhe Komunës së Prishtinës për ndërtimin e një salle koncertale.
Në një konferencë për media, ku u prezantuan detaje për gala mbrëmjen “Rame Lahaj & Friends” që mbahet më 2 gusht në Sheshin “Skënderbeu”, Lahaj tha se presioni për ndërtimin e një salle që do të akomodonte opera, balet, ansamblin popullor dhe filarmoninë do të vazhdojë.
Ministrja e Punëve të Jashtme, Donika Gërvalla, theksoi se jeta kulturore në Kosovë është një nga më të pasurat në rajon dhe se ka hapësirë për investime të mëtejshme për të përfaqësuar vendin në mënyrën më të mirë të mundshme.
Nga ana e saj, nënkryetarja e Komunës së Prishtinës, Jehona Lushaku-Sadriu, theksoi se festivali “Rame Lahaj & Friends” po ndërkombëtarizon kulturën dhe promovon vlerat e muzikës klasike të Kosovës.
Gala mbrëmja “Rame Lahaj & Friends” do të mbahet nesër në ora 20:30 në Sheshin “Skënderbeu” në Prishtinë. /Kosovatimes/
