Kryetari i komunës së Drenasit, Ramiz Lladrovci, ka njoftuar se gjatë qëndrimit në Hiroshima, ku mori pjesë në aktivitetet përkujtimore kushtuar viktimave të bombës atomike të hedhur 79 vjet më parë, bashkë me ambasadorin Sabri Kiçmari, kryetarin e Istogut, Ilir Feratin dhe anëtarët e Presidencës, Bekim Kupina dhe Dora Musa, u pritën nga kryetari i Hiroshimës, Kazumi Matsui.
“Ftesën e kryetarit Matsui që të bëhemi anëtarë të Komunave për Paqe (Mayors for Peace), ku ai ishte kryetar, e mirëpritëm me konsideratë dhe nderim për neve dhe për shtetin tonë. Komunat për Paqe (Mayors for Peace) ka në gjirin e vet 8 403 komuna anëtare nga 166 shtete”, ka thënë Lladrovci.
Gjithashtu, kryetari i Drenasit u shpreh se me kryetarin e Istogut, prezantuan shkurt komunat e Kosovës dhe mundësitë, synimet zhvillimore, bashkëpunimin si dhe shprehën gatishmërinë që të jenë pjesë e Komunave për Paqe në nivel global.
Ai tutje ka theksuar se në kuadër të agjendës, vizituan shtëpinë 400-vjeçare të samurajëve, ku u njoftuan me traditën e mikpritjes japoneze, traditën e samurajëve dhe për shtëpitë e tyre.
“Në shenjë mirënjohje dhe nderimi, Matsui ia dhurova një punim dore të Qendrës për Promovimin e të Drejtave të Grave, njëherësh i shpreha falënderim për mikpritjen dhe miqësinë e Hiroshimës me popullin tonë”, ka shkruar Lladrovci.
