Në shënim të Ditës së Dëshmorëve të Brigadës 162 “Agim Bajrami” në Kaçanik është mbajtur Akademi Përkujtimore, derisa tek varrezat dhe lapidarët e dëshmorëve në fshatin Grrabicë janë bërë homazhe nga ish-bashkëluftëtarë dhe familjarë.
Kryetari i Komunës së Kaçanikut, Besim Ilazi theksoi se 10 gushti i vitit 1998 ishte frymëzim i qindra mijëra luftëtarëve. ”Pikërisht rënia e komandanti Agim Bajrami dhe bashkëluftëtarëve Xheladinit dhe Besnikut u bë frymëzim për qindra mijëra luftëtarë për rezistencë gjithëkombëtare e sidomos të anës së Kaçanikut”, ka theksuar Ilazi.
Ish-bashkëluftëtarët dhe familjarët kanë kujtime të shumta për dëshmorët e kombit, Agim Bajrami, Besnik Begunca e Xheladin Kurtaj, të cilët ranë në altarin e lirës 26 vjet më parë.
“Ishin shumë mirë të organizuar, djem të zot. Ishin të shkathët dhe shumë besnik. Rënia e tyre neve si njësit i parë i Kaçanikut na kushtoi shumë sepse ishin figurat kryesore të këtij njësiti”, tha Naser Hasanaj, bashkëluftëtar.
“Në orët e hershme të mëngjesit është rrethuar fshati Gabrricë konkretisht lagja Kurtaj, veçanërisht shtëpia e Miftar Kurtaj, ku komandanti Agim Bajrami bashkë me bashkëluftëtarët e tij Xheladin Kurtaj dhe Besnik Begunca ishin duke pushuar. Komandanti Agim Bajrami ka dhënë kushtrimin e lirës dhe kanë filluar luftimet”, kujton mëngjesin e 10 gushtit të 98-tës, Hajrush Kurtaj bashkëluftëtar dhe familjar i njërit prej dëshmorëve.
Në shënim të kësaj dite nga shoqatat e OVL-së në Kaçanik janë ndarë dy mirënjohje për familjen Luzha dhe Konjufca nga Ferizaj për kontributin e dhënë, si dhe janë mbajtur aktivitet të ndryshme kulturore e sportive.
