Tensionet në veri e jostabiliteti politik po vlerësohen si goditje ndaj ekonomisë së vendit. Ndonëse investimet e huaja direkte gjatë pesëmujorit të parë këtij viti janë rritur për 10%, të njëjtat po vlerësohen të pamjaftueshme. Sipas njohësve të ekonomisë, Kosovës do t’i duhet shumë punë për t’i bindur investitorët e huaj.
Tensionet në veri e paralajmërimet e BE-së për masa shtesë në rast se hapet ura e Ibrit, vlerësohet se po dëmtojnë imazhin e Kosovës para investitorëve të huaj. Për këtë, nga Oda Ekonomike thonë se Kosovës do t’i duhen vite për t’i bindur investitorët që kapitalin e tyre ta bartin në vend.
Situata politike vlerësohet se po ndikon edhe tek ata që kanë investuar në Kosovë.
Mirëpo, nga Ministria e Industrisë thonë se gjatë 5 mujorit të parë të këtij viti, krahasuar me periudhën e njëjtë të 2023-ës, investimet e huaja janë rritur.
Investimet e huaja janë rritur nga 310.2 milionë euro sa ishin në vitin 2023 në periudhën janar-maj, në 341.2 milionë euro në periudhën e njëjtë të vitit 2024. Kjo rritje pasqyron një tendencë pozitive dhe rritje të besimit të investitorëve në ekonominë e Kosovës dhe kushteve që ofron vendi ynë për investitorët e huaj.
Sipas Ministrisë së Industrisë, Ndërmarrësisë dhe Tregtisë, sektorët e teknologjisë së informacionit, infrastrukturës dhe energjisë presin të tërheqin investime të huaja direkte shtesë gjatë viteve të ardhshme.
Ndërsa, nga Agjencia për Investime dhe Përkrahje të Ndërmarrjeve i kanë thënë RTK-së se investitorët e huaj janë të tërhequr nga mundësitë që ofron ekonomia e Kosovës, pozicioni strategjik dhe taksat e favorshme.
Sfidat për tërheqjen e investimeve të huaja janë përmendur edhe në raportin e sivjetmë të Departamentit Amerikan të Shtetit për Klimën e Investimeve.
