Biçikletat për kryeqytetin kanë arritur në Prishtinë, veçse ato nuk mund të përdoren deri nga tetori i këtij viti, për shkak se akoma nuk u është montuar sistemi digjital.
Ditë më parë Komuna e Prishtinës kishte vendosur edhe disa stacione për vendosjen e biçikletave, ndërkohë që, sipas komunarëve, ky projekt do të përcillet dhe, varësisht prej nevojave, do të krijohen stacionet.
Në dhjetë stacione do të jenë të vendosura gjithsejtë 100 biçikleta të kryeqytetit. Një stacion i ngjashëm ndodhet në shesh.
Nga komuna e pranojnë se është vonuar procesi i lëshimit në përdorim, e që ka qenë në plan të bëhej në fund të qershorit dhe në fillim të korrikut, mirëpo thonë se problem ka qenë pjesa e aspektit digjital, që pritet shpejt të përmbyllet.
“Përveç që ka përfundua si projekt, si pilot, do të shohim se sa do të përdoren po besoj që do të përdoren mjaftë shumë sepse është për herë të parë në kryeqytet meqë janë 100 të tilla do të bëhet një analizë pas një kohe të përdorimit të tyre një post analizë dhe të dihet saktësisht se në cila hapësira po përdoret ma shumë”, deklaron Donat Lushaku, zëdhënës i komunës së Prishtinës.
Lushaku thotë se kjo mund të ndikojë të ketë shkarkim të lehtë komunikacionit në zonën qendër.
Por në anën tjetër eksperti i komunikacionit Lavdim Hamiti, thotë të kundërtën. Sipas tij, kjo nuk do të ndikojë në shkarkimin e komunikacionit në kryeqytet, dhe sipas tij mungon infrastruktura për biçikleta.
“Problemi është se ato biçikleta a kanë rrugë për të lëvizur në kryeqytet”, thotë mes tjerash Lavdim Hamiti.
Nga komuna thonë se lëshimi në përdorim i biçikletave në kryeqytet po mendohet të bëhet në shtator dhe tetor. Derisa, nënkryetari i komunës, Alban Zogaj, kishte njoftuar përmes rrjetit social më 5 dhjetor të vitit të kaluar, për mbërritjen e biçikletave.
