Zëvendësministri i Mjedisit, Planifikimit Hapësinor dhe Infrastrukturës, Hysen Durmishi, ka deklaruar se ende nuk ka një datë të saktë për hapjen e urës mbi lumin Ibër në Mitrovicë. Ai bëri të ditur se janë në pritje të raportit final mbi gjendjen e urës, pas marrjes së një draft-raporti që konstaton stabilitetin e saj.
Sipas Durmishit, draft-raporti i dorëzuar dje tregon se ura është stabile dhe përmbush të gjitha normat e projektimit sipas Euro-kodit, pa kufizime ngarkese.
Ai theksoi se Ministria ka përmbushur detyrimet e saj përmes kontratës për përcaktimin e stabilitetit të urës, dhe se procedurat dhe testimet e kryera kanë përdorur metoda dhe instrumente të avancuara.
Ndërkohë, Durmishi konfirmoi se, pas marrjes së raportit final brenda disa ditësh, do të bëhet publike data e hapjes së urës.
Ai siguroi se ura është e sigurt për kalimin e këmbësorëve dhe automjeteve, dhe se nuk priten ndryshime në rezultatet e testimeve. /Kosovatimes/
