Me propozimin e Ministrisë së Financave, Punës dhe Transfereve, sot është miratuar Rregullorja për Procedurat dhe Kriteret e Vlerësimit dhe Njohjes së Statusit dhe të Drejtave të Personave Paraplegjikë dhe Tetraplegjikë. Ky akt i ri sjell disa përmirësime të rëndësishme për personat me lëndime të përhershme.
“Në përputhje me rregulloren e re, individëve të prekur nga pasoja të përhershme do t’u njihet e drejta për kompensim dhe mbulimi i shpenzimeve për kujdestar personal dhe plagët dekubitare kur është e nevojshme. Përmirësohet gjithashtu llogaridhënia në vlerësimet e bëra nga komisionet, përmes krijimit të një ekipi profesional me kontratë të veçantë me Ministrinë, në vend të komisioneve të përkohshme që janë krijuar më parë”, thuhet në komunikatën e MFPT-së.
Procedurat e vlerësimit janë thjeshtuar dhe përshpejtuar për të evituar burokracitë dhe rivlerësimet e tepërta që mund të shkaktonin vonesa dhe largimin nga skemat përfituese. Për më tepër, vlerësimi mund të bëhet në shtëpi për ata që nuk kanë mundësi të paraqiten fizikisht dhe, në disa raste, mund të realizohet vetëm mbi bazën e dokumentacionit mjekësor të dorëzuar.
“Rregullorja gjithashtu përfshin aspekte të tjera si vlerësimi i mundësive për përshtatje në shoqëri dhe mbështetje për rehabilitim dhe punësim, duke adresuar kërkesat dhe vërejtjet e palëve të interesit”, përfundon komunikata. /Kosovatimes/
