Binjakët e porsalindur u vranë në Gaza ndërsa babai i tyre ishte në zyrën e qeverisë lokale për të regjistruar lindjen e tyre. Djali Aser dhe vajza Ajsel ishin vetëm katër ditësh kur babai i tyre Mohamed Abu al-Kumsan shkoi për të marrë certifikatat e tyre të lindjes, sipas BBC.
Ndërsa ai ishte larg, fqinjët e tij e thirrën dhe i thanë se shtëpia e tyre në Deir al Balah ishte bombarduar. Gruaja e tij dhe gjyshja e binjakëve u vranë gjithashtu në një sulm ajror izraelit. “Nuk e di se çfarë ka ndodhur. Më kanë thënë që një predhë ka goditur shtëpinë”, tha babai.
Ministria e shëndetësisë e Gazës e drejtuar nga Hamasi thotë se 115 foshnja kanë lindur dhe më pas janë vrarë gjatë luftës. Sipas agjencisë së lajmeve AP, familja ndoqi një urdhër për të evakuuar qytetin e Gazës në javët e para të luftës Izrael-Gaza, duke kërkuar strehim në pjesën qendrore të Rripit, siç udhëzohej nga ushtria izraelite.
Një godinë shkolle është goditur pak ditë më parë
BBC i ka kërkuar ushtrisë izraelite për koment mbi sulmin dhe është në pritje të një përgjigjeje. Izraeli thotë se po përpiqet të shmangë dëmtimin e civilëve dhe fajëson Hamasin për vdekjen e tyre, i cili vepron në zona me popullsi të dendur, duke përfshirë përdorimin e ndërtesave civile si strehimore.
Por zyrtarët rrallë komentojnë rastet individuale të sulmeve izraelite. Disa strehimore të tilla në Gaza janë sulmuar javët e fundit. Të shtunën, një sulm ajror izraelit në një ndërtesë shkolle që strehonte palestinezët e zhvendosur në qytetin e Gazës vrau më shumë se 70 njerëz, tha një drejtor spitali për BBC.
Një zëdhënës i ushtrisë izraelite tha se shkolla “shërbente si një objekt ushtarak aktiv i Hamasit dhe Xhihadit Islamik”, gjë që Hamasi e mohoi. Izraeli ka kundërshtuar numrin e të vdekurve dhe BBC nuk ka qenë në gjendje të verifikojë në mënyrë të pavarur shifrat nga asnjëra palë.
