Presidentja e Kosovës, Vjosa Osmani, mori pjesë në festën e Zojës së Madhe në Letnicë të Vitisë. Në këtë rast Osmani ka thënë se në këtë fshat Nënë Tereza nisi rrugëtimin e saj të jashtëzakonshëm për t’i dalë në ndihmë atyre që kishin nevojë.
Prerisdentja Osmani ka theksuar se kjo festë i dedikohet Nënë Terezës dhe shpirtit të saj të bardhë dhe shembullit që ajo dha çdokund në botë. Sipas saj, Letnica nuk është thjeshtë vetëm një fshat por është një vend ku takohen e shenjta dhe e zakonshmja.
“Sot e nderojmë fshatin Letnicë ku e shenjta jonë nisi rrugëtimin e saj të jashtëzakonshëm. Pikërisht në këtë fshat Nënë Tereza e sotme e dëgjoi thirrjen që do ta qonte në një jetë shërbimi, dhembshurie dhe besimi të palëkundur. Në këtë festë ne sot i dedikohemi asaj, shpirtit të saj të bardhë dhe shembullit që ajo dha çdo kund në botë. Letnica nuk është thjeshtë vetëm një fshat por është një vend ku takohen e shenjta dhe e zakonshmja. Ku një jetë e thjeshtë gërshetohet me një rrugëtim jetësor të jashtëzakonshëm. Pikërisht këtu Nënë Tereza përqafoi misionin e saj, një mision që do të sillte dritë në skajet më të errëta të botës”, ka deklaruar Osmani.
E para e vendit, Vjosa Osmani ka thënë se festa e Zojës së Madhe kujton vlerat universale për të cilat punoi, jetoi dhe u përjetësua Nënë Tereza. Ajo ka theksuar se përveç Terezës, misionin për paqe po e vazhdojnë institucionet tona dhe ushtarët e KFOR-it. Presidentja mori pjesë në këtë organizim me ftesën e kryetarit të Vitisë, Sokol Haliti. /Kosovatimes/
