Burim Piraj, afarist nga Dragashi, ka shprehur shqetësimin e tij lidhur me projektin e tunelit Prizren-Tetovë, duke theksuar se ky projekt ka disa të meta për shkak të lartësisë mbidetare ku po hapet tuneli, zonë kjo që shpesh është e mbuluar me borë gjatë dimrit. Ai paralajmëron se kjo do të sjellë vështirësi të mëdha për lëvizjen gjatë muajve të ftohtë.
Piraj ka sugjeruar që të shqyrtohet një opsion tjetër, ai i unazës Prizren Jug, që do të kërkonte një tunel më të gjatë prej rreth 10 km, por që sipas tij, do të ishte një zgjidhje më e qëndrueshme dhe largpamëse për lëvizjen e përditshme.
Duke theksuar rëndësinë e investimeve të menduara mirë, ai tha: “Kjo punë bëhet njëherë e shfrytëzohet çdo ditë.”
Në përfundim, Piraj shprehu optimizmin për përparimin e bashkimit të rajoneve tona, duke e përshëndetur këtë si një hap të rëndësishëm drejt bashkëpunimit dhe zhvillimit të përbashkët. /Kosovatimes/
