Fundjava ka shënuar fluks të lartë të lëvizjeve në pikat kufitare të Shqipërisë.
Në pikën kufitare të Morinit, e shtuna shënoi një prej flukseve më të lartë të hyrjeve drejt Shqipërisë. Kolonat e automjeteve zgjateshin deri në thellësi të territorit të Kosovës. Policia kufitare përmes shtatë sporteleve të saj operoi me procedurën e kalimit të kufirit pa kontrolle për automjetet me targa të Kosovës dhe Shqipërisë, ndërsa kontrollit iu nënshtruan automjetet me targa të huaja.
Përgjatë kësaj jave pranë pikës kufitare të Muriqanit janë regjistruar më shumë dalje sesa hyrje. Është punuar me 4 sportele në dalje e 3 në hyrje. Ndërsa gjatë paradites ku fluksi është më i shtuar u aplikua procedura e përshpejtuar me qëllim evitimin e radhëve.
Vetëm përgjatë 48 orëve të shkuara pranë pikës kufitare Muriqan dhe Han të Hotit kanë hyrë 29 mijë shtetas ndërsa në dalje janë regjistruar 42 mijë
Kjo e shtune ka rritur numrin e shtetasve që zgjedhin të udhëtojnë nëpërmjet pikës se kalimit kufitar të Kakavijës. Gjatë 24 orëve të fundit lëvizja ndërkufitare ka shkuar në 10833 shtetas dhe 3509 automjete. Për të shmangur radhët e pritjes policia shqiptare po punon me 7 sportele , ndërsa pala greke me 6 sportele.
Vijon të jetë i lartë fluksi i lëvizjeve në pikën e kalimit kufitar të Kapshticës edhe këtë fundjavë. Burime nga drejtoria vendore e kufirit dhe migracionit bëjnë me dije se gjatë 24 orëve të fundit kanë hyrë nga kjo pikë kalimi kufitar në vendin tonë rreth 5300 shtetas dhe kanë dalë 5100 shqiptarë dhe të huaj.
Pritet që fluksi në këtë pikë kalimi kufitar të vijojë përgjatë gjithë muajit gusht.
