PRESIDENTI amerikan Joe Biden përshëndeti nënpresidenten e SHBA dhe kandidaten presidenciale Kamala Harris si të ardhmen e partisë në hapjen e Konventës Kombëtare Demokratike në Çikago të hënën, duke u kërkuar amerikanëve që të votojnë për të.
Duke fshirë lotët pasi u njoftua nga vajza e tij Ashley dhe duke bërë me dorë turmës që i dha një ovacion të gjatë, Biden i buzëqeshur tha: “Të dua”.
Biden: A jeni gati të votoni për lirinë, demokracinë dhe Amerikën?
Sipas Reuters, në vend të një fjalimi të pritshëm të profilit të lartë të enjten për të pranuar nominimin e Demokratëve për një mandat tjetër katërvjeçar, Biden ishte figura qendrore në fillimin e konventës katër-ditore të partisë.
Ju kujtojmë se Biden (81), i presionuar nga liderët e partisë për shkak të gjendjes së tij shëndetësore dhe mendore, hoqi dorë nga lufta për një mandat të ri në Shtëpinë e Bardhë muajin e kaluar, kështu që Kamala Harris (59) do të pranojë zyrtarisht nominimin presidencial në konventa të enjten.
“A jeni gati të votoni për lirinë? A jeni gati të votoni për demokracinë dhe për Amerikën? Unë ju pyes, a jeni gati të zgjidhni Kamala Harris dhe Tim Walz?” Biden iu drejtua turmës.
Përveç avokimit që amerikanët të zgjedhin Harrisin si pasuesin e tij në Shtëpinë e Bardhë, Biden vlerësoi arritjet e administratës së tij në fjalimin e tij, duke përfshirë forcimin e ekonomisë amerikane dhe forcimin e aleancave amerikane në botë.
Ai dënoi racizmin dhe supremacinë e bardhë që vazhdon të mundojë Amerikën, duke thënë se nuk ka vend në kombin amerikan.
Harris premtoi të mposht Trumpin
Në një paraqitje të papritur të mëparshme në konventë, Harris u zotua të mposht rivalin republikan Donald Trump në zgjedhjet e nëntorit.
“Ne luftojmë për idealet tona dhe kujtojmë gjithmonë se kur luftojmë, ne fitojmë,” tha zëvendëspresidenti i SHBA Harris në një fjalim të shkurtër, duke shkaktuar brohoritje nga turma.
Domethënë, Harris pritej të dilte më vonë në skenë, së bashku me presidentin Biden.
Por Harris i bëri homazhe presidentit aktual të SHBA. “Joe, faleminderit për udhëheqjen tuaj historike, për shërbimin tuaj të përjetshëm ndaj kombit tonë. Ne jemi përgjithmonë mirënjohës,” tha ajo.
Ka folur edhe Hillary Clinton
Ndër të tjera, ish-kandidatja presidenciale Hillary Clinton, humbja e së cilës nga Trump në vitin 2016 shkatërroi shpresat për t’u bërë gruaja e parë në Shtëpinë e Bardhë, iu drejtua tubimit.
Clinton, gruaja e parë që siguroi nominimin presidencial të një partie të madhe amerikane, tërhoqi një ovacion të fortë kur doli në skenë të hënën. “Historia e jetës sime dhe e historisë së vendit tonë është se përparimi është i mundur, por jo i garantuar”, tha Clinton.
Ajo vlerësoi presidentin aktual Biden për sjelljen e “mirësisë, dinjitetit dhe kompetencës” në Shtëpinë e Bardhë. “Dhe tani ne po shkruajmë një kapitull të ri në historinë amerikane. Kamala ka karakterin, përvojën dhe vizionin për të na udhëhequr përpara,” tha Clinton.
Ajo iu referua vazhdimisht kandidatit republikan për president, njëherit edhe ish-rivalit të saj në garën presidenciale. “Donald Trump e zuri gjumi në gjyqin e tij dhe kur u zgjua, shkroi versionin e tij të historisë. Ai është personi i parë që kandidoi për president me 34 krime,” tha Clinton duke qeshur.
Protesta fiton pak vëmendje brenda sallës – përveç përmendjes nga Bideni
Mijëra persona janë mbledhur nëpër rrugët e Çikagos duke protestuar kundër mbështetjes amerikane për Izraelin në luftën në Gazë.
Mirëpo brenda sallës, për protesta nuk është dëgjuar, derisa Biden nuk ka dalë para mikrofonit.
Anëtarja e Kongresit, Alexandra Ocasio-Cortez, ka fituar mbështetje kur e ka falëndëruar Harrisin për “punën e palodhshme për të arritur një armëpushim në Gazë dhe për kthim të pengjeve në shtëpi”.
