Një vrasje ka ndodhur mbrëmë në Prishtinë, e ku dyshohet se një grua ka vrarë me armë zjarri kunatin e saj. Nga hetimet e para, Prokuroria dyshon se motiv i vrasjes janë problemet familjare.
Në orët e mbrëmjes të së martës, një grua dyshohet se vrau kunatin e saj. Policia e Kosovës njoftoi se në rrugën “Ismet Krasniqi”, në lagjen “Kodra e Trimave”, ndodhi një vrasje e rëndë.
Ekipet e prokurorisë kujdestare nga Departamenti për Krime të Rënda, doli në vendin e ngjarjes dhe në bashkëpunim të plotë me policinë e njësitë relevante kryen veprimet e nevojshme hetimore, deri në mesnatë, për të ndriçuar rrethanat e kësaj ngjarjeje. Derisa ekipet e Forenzikës po mblidhnin provat e nevojshme për hetim të mëtejmë të rastit, ekipi i Institutit të Mjekësisë Ligjore, dërguan për obduksion trupin e pajetë të 60- vjeçarit, Xhevdet Millaku.
E dyshuara për kryerjen e vrasjes u vetëdorëzua, tha Policia. Zëdhënësja e Prokurorisë Themelore në Prishtinë, Laureta Ulaj, tha se nga hetimet preliminare motivi i vrasjes dyshohet se janë problemet familjare dhe shtoi se do të kërkojnë caktimin e masës së paraburgimit ndaj së dyshuarës.
“Nga hetimet preliminare, dyshohet se motivi i kryerjes se këtij akti janë problemet familjare, megjithatë rezultatet nga hetimi do t’i sqarojnë te gjitha rrethanat e këtij rasti. Prokurori i Shtetit, brenda afatit ligjor do te paraqesë kërkesë për caktimin e masës së paraburgimit ndaj së dyshuarës, pranë gjykatës kompetente”, tha Ulaj.
Gjatë ditës, gazetarët që kanë raportuar nga vendi i ngjarjes u penguan nga familjarët e viktimës dhe dorases së dyshuar.
Asociacioni i Gazetarëve të Kosovës tha se pengimi i punës së gazetarëve është i papranueshëm, teksa i bëri thirrje Policisë së Kosovës që në situata të tilla të krijojë kushte për gazetarët që ta kryejnë punën e tyre pa u cenuar dhe pa u penguar.
