Banorët e Kaçanikut të Vjetër janë në hall nga kundërmimi i ujërave të zeza që derdhen në Nerodime. Në komunën e Kaçanikut thanë se e kanë hartuar projektin për shtrirjen e kolektorit, teksa pritet të investohen 20 milionë euro që i ka siguruar Ministria e Financave përmes BERZh-it.
Ujërat e zeza që derdhen nga rajoni i Ferizajt përgjatë rrjedhës së Nerodimes që kalon edhe nëpër Kaçanik të Vjetër, me vete po sjellin edhe erë të rëndë. Banorët thonë se gjatë verës jeta në këtë pjesë është e pamundur për shkak të kundërmimit.
“Ne jetën e kemi të vështirë gjatë tre muajve të verës pasi që nuk është më lum por është kanalizim i ujërave të zeza. Prandaj jeta e fëmijëve dhe pleqve është e rrezikuar. Kundërmimi është aq i padurueshëm saqë as dritare as dyer nuk mund të hapen”, tha Abdullah Krasniqi, banor i Kaçanikut të Vjetër.
Përfaqësuesi i fshatit thotë se disa banorë të kësaj ane po i braktisin shtëpitë e tyre për shkak të kësaj gjendjeje.
“Jeta është bërë e vështirë shumë prej lumit Nerodime. Kemi raste që banorët janë duke i braktisur shtëpitë tyre dhe kanë shkuar për të jetuar me qira shkaktar që ky lum është kanalizim. Kemi raste kur bashkatdhetarët tonë që është një numër i madh i kanë ndërprerë pushimet e tyre shkaku i këtij lumi”, tha Adnan Krasniqi, përfaqësuesi i fshatit Kaçanik i Vjetër.
Në komunën e Kaçanikut thanë se kanë hartuar projektin për shtrirjen e kolektorit.
“Për pjesën e komunës së Kaçanikut aty ku i kemi të trajtuara prurjet e fekaleve sekondare dhe të rrjeteve primare të fshatarëve të ndryshme ne kemi të hartuar projektin si kolektor kryesor në distancë 17 kilometra që fillon nga zona kadastrale e komunës së Ferizajt dhe vazhdon deri tek fundi i qytetit. Kjo është pjesa që ne si komunë e kemi kryer e kemi hartuar projektin dhe e kemi dorëzuar në ministrinë e linjës për ta financuar për arsye se i tejkalon mjetet buxhetore të komunës”, tha Ramadush Osmani, Drejtori i Shërbimeve Publike.
Me ndërtimin e Impiantit për Trajtimin e Ujërave të Zeza në Ferizaj, ku Ministria e Financave nëpërmjet BERZh-it, ka siguruar 20 milionë euro, pritet të parandalohet shkarkimi i ujërave të zeza në lumenj dhe të ndikojë në përmirësimin e kësaj problematike.
